[(العطاوي)]

قبل بضعة سنين...

كان أخوي في دورة في ولاية ؟؟؟؟؟ الأمريكية

و هي من المناطق اللي تحيط بها الأرياف و المزارع...

و قبل نهاية الدورة بفترة...

اشتهوا حليب...( حيليييب)

و ذكر لهم مزرعة(ن) فيها بقر.. و راحولها..

يوم و صلوا المزرعة لينها..مزرعة كبيرة مرة ..و على الخط السريع..

و في زاويتها محطة بنزين..

و قاموا ينشدون العمال عن راعيها..

قالوا لهم راعيها يقال له (Mr.Kassab)...

وينه؟؟؟ (وان إهوه؟؟)

قالوا له روحوا له تلقونه في البيت الكبير اللي في المزرعة..

راحوا له ..

و لقوا هاك الشايب الطويل العريض


شنبه مفتل...

سألوه (بالإنجليزي)... : عندك حليب.. نبي نشتريه..؟!

قال لهم ( بالإنجليزي)... : ما أبيع...

يوم جوا بيمشون....

قال لهم (بالإنجليزي).... : ما أبيع ..... بس أعطي

فاستغربوا إن أمريكي يقول كذا...

دخّلهم بيته...

و أرسل واحد يجيب الحليب ...

و جلس يسولف معهم... (بالإنجليزي)

و سألهم : أنتم من وين؟

قالوا له : حنا من الشرق الأوسط....

قال لهم : من وين من الشرق الأوسط؟؟

قالوا له : من السعودية.

و فجأة....









تكلم ( بالـــــــــعــــــــــربــــــــي)...

و قال : يا هلا و الله و مرحبا..

وش انتم؟

اندهشوا من كلامه..

و قالوا له .. :فلان السبيعي.. و .فلان العتـيــبــي .. و ..فلان .........

يوم سمع العتيبي...

قال وش أنت من العتبان؟؟

رد أخوي بسرعة : روقي..

قال : روقي؟؟ من أي الروقه

قال : عطاوي..

قال : والله اني أعرفهم واحد واحد... و أعرف ديارهم حصاة حصاة..

قالوا له : أنت وش أنت...؟

قال : أنا عتيبي ..( شيباني)..

جيت هنيّا قبل أربعين سنة... معين(ن) خير .. و الحمد لله أحوالي زينة..

و أملك المزرعة هذي.. و المحطة .. و محلات في الولاية

و عندي عيال و بنات .. و حرمتي امريكية من أصل اسباني

قالوا له : ورى ما ترجع؟

قال : أنا ما اقفيت عشان أعوّد..

سالهم : أنتم وش جابكم..

قالوا له دورة...

يوم جوا بيمشون عزمهم...

قالوا له : لا والله حنا متأخرين.. و لازم نعوّد


لكن عندنا تخرج بعد أسبوع و نبي تحضره.. في المطعم الفلاني

قال : مطعم فلان العراقي؟

قالوا له : إيه

قال لهم : خير انشالله

و يوم جوا بيركبون السيارة.. مسك اخوي و قال له : ناقصك شي؟


مشوا مستغربين من الموقف

و يوم جا موعد العشا..

لينه مرسل للمطعم (مفطحات)..

و كان حاضر الحفل عمدة الولاية و مدير الشرطة.....

و اثره معروف في الولاية









و عموما القصة طويلة و لم أذكر إلا مقتطفات منها

مع العلم أني سمعت القصة من مصادر أخرى لكن بعد التعديلات

لكن هذا ما حصل لأخوي فعلا في امريكا

...

و أتمنى أن يكون هذا الموقع .. فرصة لتواصل العتبان حول العالم