ياطير ياللي بالجناحين خفاق
ابنشدك عن دربك اللي مشيته
عينت قلبً ضاع من وقت الاشراق
دورتله فالعاصـــــمه مالقيته
نسيت انا ياطير لاحط مسباق
ياليتني في رجل قلبي لويته
ركب جناحينه بلا ريش وسباق
حاولت ارده واردعه ماقويته
والضاهر انه صار للربع مشتاق
في وسط شقراء حط منزال بيته
وجدي وجود مكسر ايدين والساق
خلوه ربعه والعدا مقـــتفيته
خلوه ربعه ما الحقوله بملحاق
و مات بصبر من كف ناسً بتيته
من عقب صيت ومال وعيال ونياق
ولا زمانه وانتهى وقت صيته
على ديارً حبها وسط الاعماق
بدا مع اول عمري اللي بديته