روحي وانا باروح والرب ياقـاك=ياللي شريفه من جميع العيوبـي
ويكون عندك علم والله ما انساك=دايم معي اقرب من زرار ثوبـي
قدام عيني وين مااناظـر القـاك=شرقا وغرب ومن شمال وجنوبي
حتى منامي فيه قمـت اتحـلاك=يعني معي القاك في كل صوبـي
رضيت بعدك غصب وانا تمنـاك=رضيت بك لو كنت اكبر ذنوبـي
ياصاحبي روحي مع القلب تفداك=والنفس عيت عن هواكم تتوبـي
تقول صعب تفارقه شخص يهواك=ماتدري ان القلب فيهـا يذوبـي
كانك غريب الدار بتكون منفـاك=و شلون تكذب ما خبرتك كذوبـي
جاوبت نفسي قلت شرواك شرواك=في مهجتي تسكن و عنك تنوبـي
بس النصيب اللي عن الزين وداك=شمس الرجا به هيفت للغروبـي
الله كتبها تصير ياشـوق فرقـاك=تسكرت قدمي جميـع الدروبـي
هذا شعوري جاءك ماظن يخفـاك=حبك خسرته سلم قبل الحروبـي