هاجوس قلبي كل ما قلت ولاّ =جاني يدق القاع من غير سبّه
ان كان ما هلـّيت بالهَم هلاّ=وما اقول غير الله ربي وربّه
ما غير بالصبر الجميل اتحلاّ=عسى السعَد هَبّات حظي تهبّه
عن حاجبي صلـف النظر ما تعلاّ=أجمع حطب هّمّ الليالي وأشبّه
مبدأ .. وعن مبدا الشرف ما اتخلاّ=الهُون طبع نفوسنا ما تحبّه
أستعرض الأحداث دقٍّ وجلاّ=والجرح في كف المقادير طبّه
الهَمّ في روض القناعات فلاّ=وذبّل زهَر روض ٍمرِيفٍ وخِبّه
عليّ عَذبات المشارب تغلاّ=والما الحلو بكفوف غيري تصبّه
دنياً بتفريق الخلايق تجلاّ=الى امتلا كاس المسَرّه تكبّه
يا شارب ايام الفرَح لا تعِلاّ=إحسب حساب المقبلات وتنبّه
بالشاردات من القصِيد آتسلاّ=أقضب خفا بيتٍ وبيتٍ أذبّه