فاحت عطورك وانتعش قلبٍ اغلاك=وذعذع هواك العذب وامسيت اناديك
جيتك هنا جيتك هنا جيتك هناااك=جيتك غلا والشعر يفخر بطاريك
بعد الفراق وقسوتي جيت لرضاك=جيتك وفا شاعر يسوق العمر فيك
تعال وانس الجرح الاول ولـَيّاك=ترجع لماضينا عسى الله يخليك
تعال ما ارجي غير ضحكة محيّاك=وصوتٍ الى من زارني قلت : لبيك
إي والله اعشق همس صوتك وذكراك=أحن لك واجوع لك كل ما اطريك
من وين ما طالعت بعيوني القاك=تنزل من عيوني وفي القلب الاقيك
لو المناوي جابتك لا عدمناك=نفسي اشوفك شوف وأقبّل ايديك
حيّرتني ما بين وصلك وفرقاك=وعلـّمتني وشلون انا اهيم واجيك
والى طلبتك كلمتين ٍ من شـفاك=أما غزل ولاّ عباطه وتشكيك
تطلق سروج الخيل والشعر يزهاك=ويسمو بك المعنى واهوجس واغنيك
يا سيّدة شعري من ادناك لقصاك=تفخر بحاضرك القصايد وماضيك