بسم الله الرحمن الرحيم
السلام عليكم ورحمة الله وبركاته
هذه القصيده للشاعر الرائع والمبدع : خالد بن سعود الكبير
بعنوان : الموت حق
الموت وكل نفسٍ لها يوم=لاعنه لا حاجب ولا منه صدّه
مكتوب والمكتوب لازم ومحتوم=وكلٍ لربه منتهاه ومردّه
كم واحدٍ يُدعى له اليوم : مرحوم=وكم واحدٍ يلحق ولو بعد مدّه
الله يعين النفس لي روّح القوم=عنها وهي جوف القبر مستخدّه
تحت الثرى واللحد ضيّق ومكتوم=في ظلمةٍ سودا وحِيشه ولدّه
لا رَبع لا خلان لا حسّ وعلوم=راحو وكلٍ دمعته فوق خدّه
يا نفس لا تنسين حالك من اللوم=لومي وصيري للقا مستعدّه
الله شرَع للخلق والشرع مفهوم=وكلٍ على ما قيل يمشي بودّه
أما خلودٍ جنته دايم الدوم=والاّ عذابٍ فيه غلظه وشدّه
ترى الحياه تروح أوهام وحلوم=والعمر يمضي والليالي تعدّه
يا نفس قومي واستفيقي من النوم=هيا معي رَدّه على الحق ردّه
هيا معي لأبواب حيٍّ وقيوم=الخالق اللي كل شيٍ بيدّه
مالك جميع الخلق حاكم ومحكوم=القادر الجبار ما احءدٍ يضدّه
نبكي على بابه ونحتاط من يوم=ما ينفع المخلوق جَدّه وعَدّه