صدرك دفاي ورمش الاعيان ظلّي=من حرّ هجرانك ومن بردّ صدّتك
أغليك من دون الجفا والتغلّي=وأحسد على صدرك جواهر قلادتك
وأحسد على جيّتك يمّي محلّي = وأحسد على لمسة خدودك مخدّتك
ويشتاقلك قلبي وفكري وكلّي=وأشتاق جلساتك وصوتك وهمستك
وإن جيت باغي شوفك وما حصل لّي=واقفيت عنّي دمعة العين نادتك
تزعل على شاني وكلّه رضىً لي=ياحلو تجريحك وياحلو شرهتك
طول الثلاث ايام دمعي يهلّي= طوّلت بالغيبة ولاهيب عادتك
وغيبتك عنّي يابعد كّل من لي= مانقّصت قدرك وبالعكس زادتك
عرفت قدرك بالخفوق متعلّي= في منزلٍ مافيه عذرا تعدتك
ياكامل بالزين دقٍّ وجلّي=كل العذارى تحت خدمة سعادتك
فيصل الجبعا