[عيد الصفياني]

السلام عليكم ورحمة الله
أحبتي أعضاء المنتدى .. إليكم هذه المتواضعه
وأتمنى أن تحوز على إعجابكم

البارحة كني على واهج النار=من هاجسٍ تحرق لواهيب حرّه
وأخذ بي الهاجوس مارد ومصدار=وعجزت لا أميز لخيره وشره
واحترت في ممشاي والفكر محتار=وفرت بي الأفكار مليون فره
وأمضيت ليلي لين بانن الأسفار=أفك دولاب الضماير وأزره
وراع الهوى لو كان بالحيل صبار=تومي به الأيام ويبيح سره
وراع الهوى لو تاب عن نضم الأشعار=أدنى طوار الحب ويعيد كره
وأنا الذي فالبحر سابح وعبار=وأخذت لولوه ومرجان دره
وأتعبت رجلي في طويلات واقصار=وشربت من حلوه على كثر مره
واليوم دار بي الفلك يا عرب دار=واخترت عن موجه صحاصيح بره
أمشي وأقول اشلون ويش الذي صار=وش صار في وقتٍ تزايد مضره
أسباب منهو حط فالقلب مسمار=أقفى وأنا ابذله علومٍ تسره
عليه دمع العين يسكب ونثار=وعليه جزلات القوافي تشره
وحصلت من فرقاه ويلات وأمرار=وأردد الونات تسعين مره
ونات عودٍ طاح وعياله صغار=وكل المصايب في مطيحه تمره
ومن عقبهم كني غريبٍ عن الدار=وأعوي عوا ذيبٍ على راس حره
أو كالذي ذوده يذّكر بالأذكار=يذكر ولا شافه ولا شاف جره
يامن يوصل له جديدات الأخبار=أخبار عن باق الغلا والمبره
عليه مني عد هتاف الأمطار=سلامٍ أحلى من محاليب دره

وتقبلوا تحيتي
أخوكم / عيد الصفياني