السلام عليكم
صباح الخيرات
ما في زمان العولمة مخلوق ما أصبــح فيلسوف=حتى الطيــــــور من التفلسف فلسفت تغريدها
قبل أمس عشـرة وأمس صارت بالميات بالألوف=واليـوم حتى الرصــــــــد ما يقـــدر على تحديدها
اللي ينــــاظرها وقلبه بيـن أمان وبين خوف=أما عشـــــان وخيّــها وألا عشـــــــان وليدها
واللي ليــــــا مرت يهز الراس ويهز الكتوف=ويســـــوق من عمره ومن ماله على تمجيدها
مدري نقول البون شاســــع فالجلوس وفالوقوف=وندقها فــــوق النحـــــر حتى ما عــــــــاد تعيدها
وألا نراعي ما يدور من الصــــــوادف والظروف=ونطـــــــــــــــاوع ركاب السنين اللي تقطع قيدها
في ذمة وجيـــه العوارف والزمان اللي يطوف=إن كـــــــــــان ما سدوا ذريعتها وردوا كيدها
اللي تسمّـع وش سمع واللي يناظر وش يشوف=شدت قـواعدها وعدت مرحلة تمهيدها
ما يقنع العقــــّــال غير الفصل والراس العروف=يدحض قضيــــــــــة عمرها ويطق دعوى زيدها
وان كان عند أهل السنام علوم مثل أهل الردوف=ضاع الدليل وضـــــــــاع عمر اللي تمشّط جيدها
المترف اللي ما تليــــــــــق ألا بعشــّـاق الهنوف=إن شد قالت شــــــــــــوقها وأن حل قالت سيدها
20 / 3 / 1435هـ