يا الله يا معط العطايا الجزيله .... يا خالق ألأمه و محصي عددها
عفوك بيومن فيه مثل المليله .... يومن تفر أم الولد عن ولدها
كلن يحصل ما عمل من عميله .... شره وخيره في إكتابه وجدها
و الله على اللي ما بعد دق ويله .... راعيه تون الدراهم نقدها
من وايلر حاصل على أمر إتحصيله .... تسعه و تسعين الدول ما و ردها
صمم ورد قبل يا رد موديله .... بربع إشهور و مرتينه عددها
كامل إبميزاته ولا جاء مثيله .... أسود شبح كبدك إيداوي لهدها
مركب إرجال العلم و أهل الفضيله .... إليا بغت داخل و خارج بلدها
في مشيته يشذي إرش المخيله .... إليا تسابق برقها مع رعدها
ماودك إتشوفه و جيهن بخيله .... سود القلوب اللي كثيرن حسدها
فوقه إغلامن للمواقع دليله .... نفسه على الشده قوين جهدها
امن عليه إمع الخطوط الطويله .... الله إيسهل له إديارن قصدها
ياصل و يوصل للذي ينعنيله .... حلال صعبات العقد من إعقدها
ملفاه أبو نواف مزبن إدخيله .... فا الديره اللي قوم الله عمدها
و أبا أشتكي له حب ضاف الجديله .... حبن ملك قلبي و حالي همدها
أبو العيون الناعسات الكحيله .... يا ليت طول العمر يديه بيدها
لا من محاصل و المعوشه قليله .... و العين أشوف إن السهر معتمدها
الله و أنا ساله يلم القبيله .... هاذا منى نفسي و هاذا سعدها
و صلاة ربي عد ماسل سيله .... على شفيع الخلق ساعة نكدها
الشاعر : نواف نايف هلال الحزيمي العتيبي