[سعود حباب العتيبي]

ياونتي ونت صغيـــــر البعاريـــــــن = إلى مات ابوه يون يبغى حليــبه
حاله ضعيف وعنده اخوانه اثنيــن = والكل منهم ياكل اللي يجيبــــــــه
وقته تغير واصبح الناس قاســين = واللي يصيبه مادرى انه يصيبــــه
عقب الترف ومشاهد العين بالعين = تبدلــــت دنيــــاه ونشـــق جيبــــه
على وليفاً تلني تلــــــه الشـــــين = تل الرشـــا طالعــاً مـــن قليبـــــه
في وجــه بدواناً تهافــــــو مغبيــــن = في طالع المرزم وشـــدة لهيبــــه
مع ضف شيخاً من حساب المسمين = زبن الحصان اللي يلافخ سبيبـــه
مخلي سروج الخيل وسط الميادين = إلى قال اجيب الشيخ منهم يجيبه
ماعاد للدنيا حلى عقب غاليـــــــن = ماجابته شهـــب السنين تغديبــــه
الوقت قاسي واكثر الناس لاهين = مالاعته بقعاء وشـــاف الغليبـــــه
ناساً تبيع وتشتري بالملاييــــــــن = وناساً على البيبان تقعد كيئـــــبه
وناساً تسمى من عوزها مساكين= وناساً تسمى من ثراها رهيبـــــه
وناساً تمد يدينها مالها عيـــــــــــن = وناساً تمــــــد يدينهــــا للحقيبــــه
واحداً عشاه بدين وإيدامه بديــــــن = واحداً من التخمه يراجــــع طبيبــــه
وياونتي ونت صغيــــر البعاريـــــــــن= إلى راحت امه حن يبغى حليبــــه

آخر تعديل سعود حباب العتيبي يوم 29-Jan-2013 في 12:36 AM.