بشار طوّل والضحايا تزايد = متى يفوز الشعب ويطيح بشاّر
ونقرأ سقوط الطاغية بالجرايد = والكل يفرح انتهى حزب الإشرار
والخير ياتي عقب كرب وشدايد = ولله حكمة في تدابير الأقدار
يالله يامجري السحاب الرعايد = انت الذي تِطلع من الليف جمّار
وانت الذي تحيي الهشيم البدايد = وانت الذي تعلم خفيات الأسرار
تفزع لشعبٍ مالقى له عضايد = في كل يوم وليلة يذوق الإمرار
رمشه على صوت القنابل سهايد = يرقد دقيقة واكثر الليل سهّار
من طاغية قلبه ملته الحقايد = انجس من الخنزير واخبث من الفار
خاين مغولي للعصابات قايد = طغى ياربي بالبلد واشعل النار
والشام شعبٍ للكرامة حفايد = عزيز ماينذل لو صار ماصار
واحفظ بلادي من شرور المكايد = وادم علينا الأمن والخير مدرار
وسلّم أبو متعب سنينٍ مدايد = وانت اللي تقسم للمخاليق الأعمار
واحفظ لنا سلمان واف الوعايد = يمين عبدالله قويٍ به إصرار
أخوان نورة للمعالي روايد = بهم تماري المملكة كل الأقطار
تمت وصلوا عد نبت الحصايد = على نبيٍ جاله الوحي بالغار