السلام عليكم ورحمة الله وبركاته
هذه قصيدة تشرّفت بإلقائها في حفل زواج حبيب بن معيض بن غانم الزلامي
فـ أول كلامي ببتدي بالسلاما =سلامٍ أحلى من حليب الاباكير
ذودٍ رعى عشب النفل والخزاما=في مرتعٍ للبل ونفح النواوير
أبارك لإبن غانم رفيع المقاما =يالله عسى دنياه دايم تباشير
وانشهد انه بالمواقف حزاما=راعي وفا وافي وريف المسايير
وياهاجسي يلحقك مني ملامـا=لاتعتذر ما لـ العذر منك تبرير
لاتعتذر والحفل حفل الزلامـا=ياهاجسي ماهي بلحية معاذير
في مدحهم ماشح جزل الكلاما =ربعي ليا شانت ظروف المقادير
خلقوا على الدنيا عزازٍ كراما =واعزاز في وقت العسر والتياسيـر
شيوخ قوم من العصور القداما =وشيوخ حتى فالسنين المناحيـر
يوم انها كانت بحد الحساما=كم اشبعو من جايع الذيب والطير
اسيوفهم تضما سواة الحياما=ويروون حدبات السيوف البواتير
ويوم انها صارت براد وسلاما=بالمرجله صاروا رجالن مشاهير
أهل الكرم وأهل الفعول الجساما=وقت العسر مايشتكون المعاسيـر
من دون قاصر فالرجال الحشاما=اللي لهم بالمجد حشمه وتقدير
والصدق في كل القبايل نشاما =والنعم مكسب للرجال المناعير
وختامها مني صلاه وسلاما =على النبي عداد ماغرد الطير
وسلامتكم