هذه قصيده للشاعر ( عبيدالله بن سليم القنيفذ) يرثي فيها الشيخ ( صالح بن رجا بن مويشير ) وبعض اقاربه وجماعته اللذين توفوا في تواريخ متقاربه . مما جعل الشاعر يتأثر بشكل بالغ ويرثيهم ذاكرا مناقبهم .. ولا ينسى في قصيدته ايضا ذكر الشيخ ( رجا بن مويشير) .. وهذا ما احفظه من القصيده . يقول :
يارب عفوك ثوّر الموت الأكوان
صارت على ربعي بغبه سحيله
الموت اخذ صالح نسايل كحيلان
رجا رجا . راع الفعول الطويله
ستر العذارى يوم روغات الاذهان
يومٍ خطو اللاش عند الحليله
خلاّ المشورب لازرق البزر نيشان
يفداه عمر اللي ضيّع دليله
وصالح الى قيدوا بطوعات الارسان
ما ينحني راسه ويحمى دخيله
والموت جا السبع المبلّم بليهان
ابراهيم ابو خالد حصاته ثقيله
والموت اخذ ذيب المراقيب حمدان
اللي خذا قدام ربعه نفيله
والموت اخذ منا الشجاع ابن هيشان
عطا عطا . الى شم ريح الفتيله
ومحمد اللي ما اشتكى منه جيران
من خلقته ما جا بدرب الفشيله
الموت جاه وقبله فلان وفلان
وكم شيخ قومٍ ما يعوّض بديله
الى نهارٍ فيه عجٍ ودخان
رجّالهم بالضد يشفي غليله
والموت حق ولا من الموت جزعان
اللّي دنا يومه يقلّط رحيله
ولاني من اللّي دبّر الله زعلان
العبد ماله غير ربه وسيله
لاشك هم ربعي وغالين واخوان
واللّي فقد غاليه واعزّتي له
عسى لهم في جنّة الخلد مسكان
في جاه ربٍ كلنا ننتحي له
هذا وصلّى الله على نسل عدنان
نبينا المعصوم عن كل عيله