سبحان من تخضع لوجهه طاعه رقاب الانام= وليا طغت قوم ونواها بالاباده بادها
ونعوذ به من شر ما نعمل ونطلبه الدوام= للنعمه اللي لن شكرنا الله عليها زادها
يا بلادنا يا قبلة الاسلام وبلاد السلام= من كثر خير الله عليها يا كثر حسادها
يا بلادنا يا جعل من وحد شتاتك للرحام= جعله بجنات النعيم اللي يهب برادها
عبد العزيز اللي بذل نفسه ومجهوده و أقام= العدل , والدوله على نهج الشريعه شادها
لا بارك الله في زمان التفرقه والانقسام= جعله يروّح روحة ٍ ما ينتضر معوادها
والشعر لو انه مثل ما قالوا مجرد كلام= سوالف ٍ تعال عند المكرفون وقادها
ما مرني ليلين وعيوني محاربها المنام= كله لعين المستذيره متعبة صيادها
اللي ليا مرت على اهل الذايقه قالوا تمام= حي الله اللي صادها حي الله اللي صادها
فرايد ٍ تاخذ من الجمهور جل الاهتمام= وان مرت النقاد ما يلقى بها نقادها
الا انها زند ٍ يشب النور في وجه الظلام= وخلاصة افكاري فتيلتها وقدح زنادها
يا هاجسي ما عاد فيه صيام طولت الصيام= اقلط على اللي مقعد ٍ راسي بريح قنادها
اللي مضت يا هاجسي عدت وعداك الملام= و المقبله يا هاجسي وصلتك في ميعادها
شد الحزام ليا حصل ما يدعي لشد الحزام= واقضب عنان كروش واسرجها وفك حدادها
انا حشيم وجايني دعوة رياجيل ٍ حشام= و الخطوة اللي في سنعهم ما قصرت قيادها
حسب الصداقه و الزماله والوفاء والاحترام= سلام يا ربع ٍ كرمها من عصور اجدادها
سلام يالجهنان وتحية هل الجنة سلام= باسمي واسم كل الضيوف شيوخها وافرادها
انتم كرام و وارثين الطيب من روس الكرام= قوم ٍ بشاشتها تكفي ضيفها عن زادها
انتم جهينه مزبن الخايف ليا ثار العسام= وانتم مبرهجة الكبود وجرحها و ضمادها
وانتم رياجيل المواقف والمهمات الجسام= ورّادة حياض المنايا لا فهق ورادها
وانتم كبيرين الاسامي فالمقال و فالمقام= كل المكارم يا جهينة معتلين شدادها
وانا من عتيبه هل النخوه معطرة الحسام= قوم ٍ تعيّد بالرقاب الحمر قبل أعيادها
في عنفنا ذروة سنام وطيبنا ذروة سنام= الله جعلنا فوق وجه الأرض مثل أوتادها
ثقل وشموخ وهيبة ٍ تفضى صماصيم العظام= وليا التفتنا للخصم يفنى وهو ما عادها
سدنا على نجد وتسيدنا وناصرنا الامام= لين اذعنت لامره سلاطين الرجال وسادها
بالمختصر وبدون نقص ودون زايد فالكلام= وبلا قصور ٍ فالرجال اقرابها و ابعادها
ربعي على صدر الزمان وسام ما مثله وسام= قبيلة ٍ يعتز تاريخ العرب بامجادها
والشاعر الواعي يعد امجاد ربعه ما يلام= ولا الغشيم ان ما نقص من مجدها ما زادها
صح لساااااااااااااانك لين ترضى وإلى رضيت وبعد الرضى
أبو مشعل
لاعدمناك
هذا أنت دايم أبيض وجه
تحيه معطره بعطر الورد
| التوقيع |
ماعالج الجرح الكبير إلا صدور أمراً كبير=الأمر سامي واصبح كحيلان بولايه عهد
حراً يموت وحر بالجنحان ينهض بالمطير=حمل الأمانه لو ثقيله قدها يابو فهد
وصل بن وصل الله الثبيتي |