الحب شايب والفراق ابنه العاق=والوصل غايه والقصايد وسيله
اثر المفارق له علاقه بالاخلاق=ويقصر طويلة صدر راعي الطويله
مافيه اشرّ من الهواوي ليا ضاق=من ضيقته حتى البزر يشتكي له
ياللي غضبت وكانت حلولك فراق=الغيض ولعه والمجادل فتيله
ابليس للفتنه وللشر سبّاق=يجيك في صورة رذيل ورذيله
العين مايغدي بها كل برّاق=والاذن ماكل الحكي ترتخيله
راعي الكلام يزّود الطاق بالطاق=يحكي بشخص وياصله ويحكي له
خص ٍ ليا كان الحكي بين عشّاق=ماله سوا: مالك دخل والفشيله
لو شفت وش قيمة غرامك بالاعماق=ماطعت لو لاموك فيني قبيله
ماهو تضيّق صدرك وتركز الساق=كنّي كفرت وقاتل ٍ لي قتيله
ياللي خدودك قطنه وعودك دقاق=والوجه ياحلوه وياحبني له
عليك ماظني بتحتار الاذواق=الا اليا كانه هبيل او هبيله
صغيّر ٍ وتشيل حمل ٍ ماينطاق=وشلون عافرت الحمول الثقيله
وانا احسبنك طيّب وقلبك رقاق=يامدرّس فنون القساوه لجيله
رح والشقا على الهواجس والاوراق=ياللي عقب فرقاه شوقه بديله
اشتاق وادري مانت راجع لو اشتاق=مير العوض بالذكريات الجميله
= للشاعر سلطان بن بتلاء