قصيدة اعجبتني واتمنى ان تنال على اعجابكم
ما تطلبه يا زين الاوصاف يفـداك *** لرضاك يرخص لك ثمن كل غالي
اطلب مطاليبك وما تطلبـه جـاك *** روحي فدى روحك و غالي حلالي
لا تحسب اني يا ادعج العين باجفاك *** لو عشت في غلبك بطول الليالـي
اعيش في طول الليالـي بذكـراك *** و انظر لعطفك يا شبيـه الغزالـي
وشلون مع شكواي قدمت شكـواك *** امد حبلك وانـت تقصـر حبالـي
صارت نهاية حبنـا مثـل مبـداك *** لا شفت هزل ولا عطايـا جزالـي
الله بفعلك يا اشقر الراس يجـزاك *** و يمد لي صبري عزيز الجلالـي
و الا مثل بلـواي بالحـب يبـلاك *** حتى تجاوبني على ما طـرى لـي
و لو تعتذر لا تحسب انَا عذرنـاك *** ما يقنـع الغالـي معاذيـر غالـي
ما يقتنع في عذر مثلـك وشـرواك *** لي صار حبه داخل القلـب كالـي
و اعرف ترا لولا الغلا ما تبعنـاك *** يوجد على البيدا حـرام وحلالـي
لولا غلاك اللي بقلبي و رجـواك *** فتحت لي في غير حبـك مجالـي
هذي ثلاث سنين وانا اتبع رضـاك *** ما فيه يوم قـد جـوك صفـا لـي
تلعب بقلبي لعبـة الفـص بيـداك *** تقرع بي اقراع الرشـا بالمحالـي
يا ليتني دبله علـى كـف يمنـاك *** والا الزرار اللي على الصدر عالي
دليل حبي يوم اجـي مـا لقينـاك *** كن الفلك من باقي النـاس خالـي
اتمنى ان تنال على اعجابكم