[نايف العبيد العتيبي]

ياملاذ الحسن يالرمش الذبوح = الطف بحال الشجاع المستميت
بطّل عنادك وخلك لي سموح = وش اسوي دامني فيك ابتليت
غبت عني وابتدى قلبي يفوح = والمؤشر يحتمي كل ما اختفيت
آتذكر حسنك الباهر وآنوح = وجفن عيني من غيابك مايبيت
صورتك في داخلي دايم تلوح = باقية لو غبت عنّك ماسليت
ياشبيه البدر يالوجه الصبوح = انقطاعك نار وظلالك حليت
كيف يعيش الآدمي من غير روح = والشجر لولا المطر أصبح فتيت
اسألك باللي حمل بالفلك نوح = اللي يسمع دعوتك كل ما دعيت
خذني تكفى للقمم عفت السفوح = ضيعتي ماضاعها " ابن الكميت "
انت نبضي وانت همي والطموح = انبساطي واحتياجي ماحييت
جيت لك كلّي معاناة وجروح = وإنت خذني ياحبيبي " كومبليت "
من سقط في قلبك يعاف النجوح = ومن يشوفك يعطي هالعالم " ديليت "
سمني ماشئت قل عني " لحوح " = ما اتنازل عن غرامك لو جفيت
طالبك خذها نصيحة من نصوح = خلّنا نبقى مثل " روميو و جوليت "
ينكتب إسمي مع إسمك وسط لوح = وتبقى قصتنا مونولوج أوبريت
هذي القصة وقلته في وضوح = إن قعدت أقعد وإذا تسري سريت
والله ماخليك لو عني تروح = زنقة زنقة دار دار وبيت بيت