هذه القصيده قلتها في مناسبة زواج الاخ نايف بن عبيد بن صاهود الرفيل القسامي
واتمنى ان تحوز على اعجابكم
سلام تسليمه على نهج الاسلام= تسليمتن تبر الكبود العليله
عداد من صلى وعداد ن صام = وعداد مالاحت بروق المخيله
وعداد ماهبت ذعاذيع الانسام= لو انها في حق ربعي قليله
تسليمتن تضفي على الآد قسام= وضيوفهم من كل دار وقبيله
العزوه اللي من قبل حكم الامام= تاريخهم يرويه جيلٍ لجيله
اهل الوفا والطيب من ماض الاعوام= واهل الكرم واهل الفعول الجزيله
افعالهم يبصم عليها بالابهام = ماينجحد فعل السلات ومثيله
شرابة الفنجال قدام الاخصام= ومروية حدب السيوف الصقيله
وفعل الرفيل اللي ماتمحاه الايام= ذرى وستر الجادل ام الجديله
يوم انهم قالوا تبا اعقال وخطام= قال اتركوها انا عقال الاصيله
وغيره من ارموز القبيله والاعلام= اللي تعد افعالهم مستحيله
وحتيش لو املا الدفاتر بالاقلام= ماحصيت فعل اهل الفعول الجميله
هذا وانا من عزوتن يوم الاقوام= كم فرقوا بين الخليل وخليله
عوازمٍ وقت اللقى درع وحزام= وزنادهم يقدح بخشم الفتيله
الهم مواقيفٍ صعيبات وعظام= ولهم مع التاريخ سيره طويله
من غير قاصر في هل الشرق والشام= كل القبايل كالت اللي نكيله
واليوم امن وآمان وايمان واسلام= تحت ضلال ام الغصون الضليله
الشجره اللي خيرها للبشر عامَ = آل السعود مزبنين الدخيله
الحكم حكم الشرع ماغيره احكام = وعنا يشيلون الحمول الثقيله
يالله تعز الحكم وتعز الاسلام= وحكمٍ على غير الشريعه تزيله
آمين يامن بالخفيات علام = يامن نساله عفوه ونلتجيله
واللي بقي مبروك يانسل الاكرام= يامن جمع كل الصفاة النبيله
نايف على اسمه والفرح والسعد دام= ياحظ من صارت لمثله حليله
الله يحقق لك بدنياك الاحلام= وعسى فرحك الليله وكل ليله
وختامها صلوا على خير الانام = اللي بعث نور ونذير ودليله
وسلامتكم