هات الحطب لنار ياذيب شبو=وحط الحطب بالنار سمرن جلالي
وهات الدلال وخلو النار تعلو=وحمس لنا بنن بالثمان غالي
نجرن يصوت لنشاما تعالو=الهم ينادي يرفع الصوت عالي
وتلافو الجيران لصوت لبو=هذا صديق وذا رفيقن موالي
ويازين جمعاهم على شبة الضو=والكيف يمشي والسوالف هيالي
سوالفن ماهيب تبنا على سو=مرفوعتن عن قول قيلن وقيالي
ولياوطاهم واجبن ماتغبو=مامنهم اللي بلوازم يبالي
ربعن على فعل الفضايل تربو =من طبعهم ما يقبلون الهزالي
سلايل اللي بالفخر قد تقافو =تاريخهم محفوظ طول الليالي
راحو وتبقى افعالهم كنها تو=اهل الشرف والطيب وهل المعالي
وعيالهم بفعالهم قد تباهو=فعلن يشرف كل ماجا مجالي
عيالهم بالمستوى ماتدنو=على مناهجهم قديمن وتالي
في مجلسن صافي به القلب والجو=كلن على الثاني عزيزن وغالي
وبعد انتهى المجلس بعد ماتقهوو =تفرقو بعد العلوم الجزالي
تفرقوا بعد العشا يوم صلو=كلن سرا قلبه من الحقد خالي
وبعد العطش من طاعة الله تروو=يقدمون الدين عن كل بالي
والثلث الاخر تالي الليل قامو=كلن سجد وحده لرب الجلالي
وفي جارهم ماقط قالو تردو =الجار معهم طول الايام سالي
على الشحم والهيل بلجار هلو=دايم معزز مايجيه الميالي
والضيف لقبل رحبوبه وحيو=والكيف يعمله بهدف الدلالي
مع حايلن تذبح ومنها تعشو=ايدامها عصبن على الرز مالي
وخويهم ماقيل دونه تخلو=ليا جا نهار الهوش والدم سالي
ودخيلهم لاصاح دونه تناخو=يثنون من دونه بحدب السلالي
وليا حدث الجهال مشكل تلافو=تلافو الموضوع قبل الجدالي
من خوف ناسن بالنميمه تمشو=يمشون مابين الربوع الغوالي
بالكذب والنماة شالو وحطو=يبون للفتنه يصير اشتعالي
ثم صلح الموضوع بالخير ساوو=استدركوها قبل يوم القتالي
وصارت فعايلهم الى المجد تسمو=فعلن ينومسهم علي كل حالي
وصلاة ربي عد مايمطر النو=وعداد مالاحت بروق الخيالي
وعداد ماصلو بمكه وحجو=على نبين صادقن بالمقالي
آخر تعديل الرااقي يوم 10-Jan-2012 في 04:51 PM.