راشد السحيمي
مرحبا ترحيبة ما تقدر بالفلوس = بنكها صدري وسلم الرجال احسابها
قوم يالفهمي بعلمك في بعض الدروس = الدروس تزيد وتقل وانت ادرابها
عبدالحميد الفهمي
البقى ياللي صنعت التنافس للنفوس = عاشت الحفله وحضارها وأصحابها
القيام احلى لنا وانت ما حولك جلوس = والشباب اليوم زادت على شيابها
راشد السحيمي
بارك الله فيك مير المعاني حد موس = ماني اللي كل ماعرضت له جابها
تطلع النيبان يا صاحبي قبل الضروس = والشباب اليوم فيها خلل في اعصابها
عبدالحميد الفهمي
بارك الله فيك لكن عينك لا تهوس = ليلها دوبه وقامت ترف اهدابها
ما يقارن ناب طيب وضرس فيه سوس = يا خبير في ضروس العرب وانيابها
راشد السحيمي
لو ترف العين يمكن تبشر بالعسوس = والعرب حضارها تنتظر غيابها
انت ليش تطيح في الحبس ما انته بمحبوس = العلوم اللي في بالك مقفل بابها
عبدالحميد الفهمي
ما تمنينا لك الجور يا جار العروس = مير هذي حجر صكت عليك اشعابها
يا لعل الله يفكك من اليوم العبوس = ان عرفت اسبابها لا تكون اسبابها
راشد السحيمي
روسنا في حجر تعلا على مليون روس = يعلم الله ما سكنها يا غير اصحابها
من هو اللي يمنع الطفل من رضع الديوس = الديوس اللي عرف خيرها حلابها
عبدالحميد الفهمي
روسكم في حجر والحجر خلاها يبوس = ما تميز مطفي النار من شبابها
ما حرمكم من ركوب الجموس الا المجوس = يا جمال ما تشوف اعوجاج ارقابها
راشد السحيمي
واضح انك بين ضلعانها تقل محموس = انت عقرب والعقارب قطعت اذنابها
ما تحصل بيننا لا مجوس ولا جموس = صاحبي لا شاف له قبة صلى بها
عبدالحميد الفهمي
لا تجي قصر الفخامه بشينات اللبوس = وانت في وسط المدينه وبين هضابها