الشيخ تركي بن حميد رحمه الله شيخ القبيله في وقته تكاد تكون قصيدته هذه اشهر القصائد على الاطلاق والتي مازال يردد الناس ابياتها حتى اليوم ،
لما فيها من حكم وشجاعه وكرم وحماسه وقوة وعزة وفخر وفروسية
ويذكر الرواة ان الامير تركي قالها بعد عودته من محمد بن هادي وفشلهما في الاتفاق على نزول عتيبه صلحا لكن ابن هادي رفض ،
وبعد عودته جمع قومه وقادة الفرسان وتباحث معهم في الامر فمر بهم راعي يتغنى بالشعر عائدا من المرعى
فجاء مطلع قصيدته "تلعب طرب وانا بنومي هواجيس=" ،
وقد قيل انه عندما اتى ابن هادي كان لابسا جوخه تخط من تحت رجليه واستقبله ابن هادي وطلب من ابن هادي فض المنازعات
وان يحترم الاتفاق بينهم خاصه انه ادى ماعليه من تعويض بما فقدته قحطان من خيل ولم يعاد قعود زبن المسروق ،
ولكن ابن هادي رفض الا المزيد لان اعداد عتيبه زادت واكتسحت المراعي وضاق المرعى لحلال قومه وهذا ليس بالاتفاق
وقال كلمه المشهورة " من جاء بدون دعوه يجلس بليا فراش " ، لكن كان في بداية الأمر جوار ولم يمانع محمد بن هادي بمجاورة عتيبه ،
الا ان ممن حوله غيروه لانهم خافوا من ان تضيع مراعيهم ويكتسحها هذه الاعداد الكثيرة ، فخرج ابن حميد من عنده غاضبا
فقالت امرأة محمد ابن هادي لترين منه مالايسرك فقد دخل تخط جوخته بالارض وخرج وقد ارتفعت من غضبه
وحدث بينهم الكثير من المساجلات الشعريه بعد ذلك ثم خاضوا الكثير من الحروب انتهت بنزوح ابن هادي من نجد
رحمهم الله جميعا واسكنهم فسيح جناته
نومك طرب وانا بنومي هواجيـس=ما ساهرك بالليـل كثـر الهمومـي
أسهر اليا نامت عيـون الهداريـس=بالليل اساهـر ساريـات النجومـي
أونس بقلبي مثل صلي المحاميـس=الله يلـوم اللـي لحالـي يلـومـي
قالوا جهلت وقلت جهلٍ بـلا قيـس=الجاهل اللي مـا يعـرف اليمومـي
أشوف عـدلات الليالـي معابيـس=ولا احدٍ من الدنيا عظامه سلومـي
البني ما يصلح على غير تأسيـس=ومن لا تعلّـم مـا تسـر العلومِـي
ولا خير في كثر الحكي والتماليـس=وقولٍ بـلا فعـلٍ يجيبـه وهومِـي
واليا ركبت معالجـات المضاريـس=يبدا على كبـدي لهيـب السمومِـي
بالليل أصالي حاميـات المحاميـس=والصبح أصالي كـل قبّـا وكومـي
واقفن بنا مثـل النعـام المماريـس=ليا خف عجلٍ مع رفيع الحزومِـي
نستلحق اللـي يطلبـون النواميـس=اللي مع الاقصين وادنـا اللحومـي
ولومي على اللي ينقلون العبابيـس=صنع الفرنج وكل رامـي لحومـي
وشلف ٍ تركّب بالرماح المناسيـس=وسلت المهار وكـل قبّـا قحومـي
والعز فوق معسكـرات السواديـس=اليا قصدت اللي بالاشيـا رحومـيِ
قـب ٍ تنـازا بالنشامـا كراديـس=والطيـر فـي روجاتهنّـه يحـوم ِ
إن جن بالميـدان مثـل الدواويـس=وتعاقبـوا مـن فوقهـن السهومـي
عـرج باهلهـن كنهـنّ القرانيـس=على الطريح مصوبرات ٍ كظومـي
حتى يزين لنـا المثـل والتوانيـس=والكيف طاب لمن يفـكّ القحومـي
ومن لا يقلّط شذرة السيف والكيـس=يصبح عليه مـن الليالـي ثلومـي
ومن لا خذا الدنيا بميـز ٍ وتقييـس=مثل الذي يسبـح ببحـر ٍ يعومـي
كلّ القلـم مـن كتبنـا بالقراطيـس=والخيل من كثـر الدلاليـج تومـي
وشيخ ٍ لنا يعطى الفقارا المفاليـس=عسـاه بالدنيـا بـعـز ٍ يـدومـي
حر ٍ ليـا دبّـت عليـه النواميـس=اليا اعترض جول الحباري صرومي
اليا اكترب من بعض الاشيا سبابيس=أعـزم ولا بـد الفـرج للعزومـي
ثوب الفرح لبسك نظيف الملابيـس=إن قيل بايـام الكـرب والزحومـي
واعمل وتلقا وافهـم العلـم بالقيـس=ودنياك لو زانـت تراهـا نقومـي
تضحك وتخفي لك خفي الهناديـس=تفطر لنا يـوم ٍ ويـوم ٍ تصومـي
أربع سنين ودمع عينـي أماريـس=العين تسهـر كـن فيهـا هزومـي
يجلي صدا قلبي ضبيح المهاريـس=ليا جاك شرّاب الحشايـش يعومـي
ودلال فوق النـار دايـم محابيـس=إكرامهـن حـق ٍ علينـا لزومـي
من صنعة الصبّة وخمس ٍ تخاميـس=وبريّة ٍ تعمـل بهـن كـل يومـيِ
وابهارهـا عشـر ٍ بليـا دنافيـس=كيـف ٍ يعـدّا للنشامـا القرومـي
عـدّه لحمّـاي الجيـاد المراويـس=والا الحصان اللي بقينـه وهومـيِ
وصلوا على سيد البريـة بتدريـس=صفوة قريش اللي مشى باليمومـي
عدّ النبات وعّـد ذاري الطعاميـس=واعداد ما يمطر سحـاب الغيومـي
وهنا صوتية بصوت المُنشد الكبير [ مهنـا الدلبحـي العتيبـي ,
http://www.qassimy.com/nu/voices-action-show-id-230.htm