[عزارم]

قالها سنة محدار عتيبة في نجد بعد معركة سناف الطراد سنة 1269هـ ضد ابن هادي شيخ قبيلة قحطان الغالية الكريمة.

تلعب طرب وانا بنومي هواجيس= ماساهرك بالليل كثر الهمومي
اسهر الى نامت عيون الهداريس =بالليل اراعي ساهرات النجومي
اونس بقلبي مثل صول المحاميس= الله يلوم اللي لحالي يلومي
أشوف عدلات الليالي مقابيس= ولااحد من الدنيا عظامه سلومي
تضحك وتخفي لك خفي الهناديس= تفطر لها يوم ويوم تصومي
اعمل وتلقى وافهم العلم بالقيس= دنياك لو زانت تراها نقومي
قالوا جهلت وقلت جهل بلا قيس= الجاهل اللي مايعرف اليمومي
من لا يدوس الراي من قبل ماديس= عليه داسوه العيال القرومي
ومن لا يقلط شذرة السيف والكيس= تبدي عليه من الليالي ثلومي
والقصر ما يصلح على غير تاسيس= ومن لاتعلم ماتسر العلومي
ومن لا خذا الدنيا بميز وتقييس=مثل الذي يسبح ببحر يعومي
وليا توافق مشور السو وابليس= تبر منه وعز ربي يدومي
كل القلم من كتبنا بالقراطيس= وركابنا من كثر الاقران تومي
ولاخير في كثير الحكا والتماليس= وقول بلا فعل يجي به وهومي
والعز فوق معسكرات السواديس= اليا قصدت اللي بالاشيا رحومي
قب تنازا بالنشاما كراديس = والطير في روجاتهنه يحومي
بالليل اصالي حاميات المحاميس=والصبح الاوي كل قبا قحومي
اربع سنين ودمع عيني اماريس= العين تسهر كن فيها هزومي
والى ركبت معالجات المضاريس= يبرد على قلبي لهيب السمومي
صوابنا بالميل عمق الى قيس= وطريحنا في مثبره ما يقومي
وان جن بنا مثل النعام الاماريس= لى خف عجل مع رقاق الحزومي
نستلحق اللي يطلبون النواميس =اللي من الاقصين وادنى اللحومي
وان جن بالميدان مثل الدواويس= وطار الغطا عن قانيات الرقومي
عرج باهلهن كنهن القرانيس= على الطريح مصوبرات كظومي
فلومي على اللي ينقلون الدبابيس= وصنع الفرنج وكل رامي لحومي
وشلف تركب بالرمح المناسيس= وقحص المهار وكل قبا قحومي
والى سمك عج الرمك والملابيس= المسعداللي حظ ربعه يقومي
والشيخ من يعطى الفقارا المفاليس= ويبدل العسرة بعز يدومي
والحر لى دبت عليه النواميس= يشهر وعن دار المذلة يشومي
واليا اكترب من بعض الاشيا نسانيس= اعزم ولا بد الفرج بالعزومي
باب الفرج لبسك نظيف الملابيس= ينجيك بايام الكرب والزحومي
يجي صدى قلبي ضبيح المهاريس= لى قام شراب القهاوي يعومي
ودلال فوق النار دايم مجاليس= اكرامهن حق علينا لزومي
من صنعة (الصبة) وخمس التاخميس= برية يعمل بها كل يومي
وبهارها هيل بليا حواسيس= كيف يعدى للنشاما القرومي
عده لحماي العياد المراويس=والا الحصان اللي بقينه وهومي
حتى يزين لنا المثل والتوانيس= والكيف طاب لمن يفك القحومي
وصلوا على سيد البرية بتدريس= صفوة قريش اللي مشى باليمومي
عد النبات وعد رمل الطعاميس= واعداد ما يمطر سحاب الغيومي