زبن القاضي:
في حفل شيخ(ن) كرموه الكريمين
سلام ياربعي وياتاج راسي
الاد عاصم ملحقين المخلين
ماهو غريبن طيبهم شي اساسي
حمدان العصيمي:
يامرحبا بمرجحين الموازين
اللي بحرهم غبته ماتقاسي
ياشاعر الهيلا ترى الناس حرصين
حافظ على كرسيك بين الكراسي
زبن القاضي:
انتم وحنا كلنا نصرة الدين
خلك يابو راكان رجل(ن) سياسي
عمهوج خضنابه جميع الميادين
فالشعر والا في نهار الحماسي
حمدان العصيمي:
ترى الامانه في يدين الموامين
ماني بقايل فالامور التباسي
ادارستك فالعلم مغير فصلين
باقي على التخريج فصل(ن) دراسي
زبن القاضي:
علم به الغايب واخذ علم هالحين
بشت(ن) لبسته يالعصيمي مقاسي
فصلين سدت في دروسك لك سنين
لاخير في كثر الحكي والحساسي
حمدان العصيمي:
مالي دخل فالديلكو والبليتين
من خوف يحصل فالسلوك التماسي
صحصح من الغفله ترى الناس صاحين
مانته مغير فالجبال الرواسي
زبن القاضي:
خابرك ماتجمع قلوب المحبين
عكيس ياحبك لدرب العكاسي
حب الملك فقلوب كل الملايين
ملك عظيم وفي مكان (ن) رياسي
حمدان العصيمي:
محبة ً مادمعت لاجلها العين
مصيرها تفشل بوقت(ن) قياسي
وسلامتكم