[سفير الدوله]

من اقوى المساجلات الشعريه بين الشاعرين :
( الشيخ فيحان بن سلطان الشغار ) و ( الشاعر عبدالله العطني )

عبدالله العطني

فيحان ناديتك عقب جرهد الليل =
قلبي تصاريف الليالي كونـّه =
ناديت يالشغار يوم أبدع القيل =
امواج قلبي هيجنن وأغرقـنه =
لاعاش رجل ٍ يرخي الراس للميل =
الذل نار وعزة النفس جنـّه =
هات الحطب واترك لي البن والهيل =
ليلي سرى والنجر تطرب لدنـّه =
ماد اللزز حفيت به الهجن والخيل =
ومن هاب هومات العلا ماأوصلنه =
ياطير ياللي من مجانيه ماشيل =
وياطير ياللي سبـّـقه خالفنه =
طير ٍ وحش به للشواهق مداهيل =
كل الحبايل له ولا جـوّدنه =
للخال يصبح ثم يمسي مكاحيل =
صفق بجنحانه وهن طاوعنـّه =
نزر ٍ عيوف وهيضه طفحة الكيل =
ومن بان راسه لليالي رمنـّه =
ناديت لك ياللي تحب التعاليل =
صاحبك ظن وخيـّب الله ظنـّه =
أبي المكاسب ماطلبها شمهليل =
معموس عطشان ٍ بلاهوب كنـّه =
أعز نفسي والمعزه غرابيل =
وادعيك ياللي هومة العز فنـّه =
حيل ٍ لقاح ولقـّحن عودن حيل =
ومن عاند الايام كره أغصبنه =
فيحان علمهم عن الجدي وسهيل =
فيحان علـّمهم ترى العلم سنـّه =
علـّـمهم ان المقفيات المقابيل =
تزيد عقل الرجل ماينقصنـّه =

رد الشاعر فيحان الشغار

يامن يناديني بزين التماثيل =
يوم الليالي عن هواه احرفنه =
مثايل ٍ فيها عن الحال تفصيل =
ماجابهن لين الضمير احرقنه =
شرد ٍ لغيره ماتجي بالمحابيل =
احرافهن بايديه من غير اعنـّه =
تجملن بالصدق من غير تجميل =
عبيد عن غيره كتم سرهنه =
يامن طفح قلبه من الهم في سيل =
ياشاكي ٍ تشكي على من خذنه =
سود الليال بركبهنه تهاويل =
وألا العمى يرتاح بأطرافهنه =
والرجل له من ميز عقله دواليل =
ومن طاوع اشوار الرجال اهلكنه =
وبعض الحكي يصعب على راعي التيل =
مايوصلون اللي غرامه يكنه =
الله يقدينا هدف بادع القيل =
اللي محضرهن عقب ماأحرجنه =
زانت له الجلسه بجنب المعاميل =
ويهيـّض أفكاره صدى نجرهنه =
أحرف حروف الكتب من غير تشكيل =
قلبي ملوّعنـي على كتبهنه =
اشرب هماج العز مثل الشهاليل =
شربه ولا شربة قراح ٍ بمنـّه =
العز من طبع الرجال المشاكيل =
مسالكه شرواك مايجهلنه =
وان كان لك من غيب رايك محاصيل =
اقضب لقاح الحيل عن حيلهنه =
وخلـّوه ترى المقفيات المقابيل =
تزيد عقل الرجل ماينقصنه =