السلام عليكم
الاخوان المحترمون
داهية عتيبة ، ما عليك زود
راعي التعاليل ، أبشر بسعدك
((الدلبحي)) ، أبشر يا الغالي
سليمان ، أنا موجود يا طويل العمر
المسمى عجاج باليل أترفع!!! ، ومشاركتك طبعا لدى الاخوان سيتصرفون بها أكيد حتى يحافظون على سمعة هذا القسم من الالفاظ البذيئة!!
================================================== ====================================
كان الشاعر الكبير مفرح الظمني في زيارة الامير تركي بن عمر بن ربيعان ، وأقام الامير أبن ربيعان وليمة غداء له (مع ملاحظة أني قلت عشاء وهاذي زلة مني!) ولكن الشاعر لم يستطع المكوث بسبب أن خوية اللي معه مستعجل فصار بين نارين أما يقعد ويتغدى عند الامير وصاحبة اللي معه يبتلش أو أما يمشي مع خوية ويخلي غدا أبن ربيعان وهاذي كبيرة وفي حقوق عند العرب ، فشاعرنا أبتلش بعمرة فقرر أن يمشي مع خوية ويمدح بقصيدة رائعة أبن ربيعان يعتذر منه ويوضح كل الامور وهذا ما حدث.
والان أخليكم مع القصيدة التي موجودة في ديوان الشاعر مفرح الظمني :
(شيخ الرياجيل)
قصيدة لشاعرنا بالاعتذار من الامير تركي بن عمر بن ربيعان العتيبي حيث أقام الامير للشاعر وليمة غداء ولكنه لم يستطيع الحضور فقد كان رفيق الشاعر على عجلة من أمره ولم يستطع شاعرنا الحضور فأرسل هذه القصيدة يعتذر ويقول:
يا شيخ يا بن الشيخ شيخ الرياجيل = يا عز روق اليا بلتهم بليه
يا بن عمر ريف اليتاما المراميل = يا عون من يرجى وراه العطيه
ياللي محلك للنشاما مداهيل = غير الشحم والهيل فيك الحميه
لولاك تركي كان سميتك سهيل = عليه أبن حثلين ساق المطيه
أسمح لنا يا بن الذي يتعب الخيل = أنا مقصر والمطاريش أذيه
لزمت عزيمتكم وحنا معاجيل = ولاني بمن يعصى مشورة خويه
عن شوف ديوانك نحتنا المحاويل = من الرياض الى الكويت الابيه
لازن نعوضك باليال المقابيل = وأن عدتها يا شيخ حقك عليه
وأسلم وسلم لي على كل حلحيل = نسل الفهود أهل النفوس النقيه
اللي بمجلسهم تدور الفناجيل = ربعن طربهم صبة الشاذليه
أولاد روق نخضبين المصاقيل = لاجنب الراعي طريق الرعيه
لحقوا على اللي يبردن المغاليل = نسل الصويتي من بنات العبيه
مع ضف أبو تركي بعيد المصاويل = عوق الخصيم اليا تعدى أردعيه
هذة هي القصيدة وسلامتكم
الباحث المطيري