صحيح الهوى يثر على صحة الأجساد=حقايق على العشاق بانت معالمها
ألا ياهوى العشاق تأثير جرحك حاد=تسلط على أرواح الأوادم وتعدمها
تعاملك معها ضد الإنصاف والإرشاد=ولافيك رأفة للمخاليق ترحمها
ضحاياك بالآلاف فاقت عن الآحاد=ونارك على أهل الحب حمرٍ مياسمها
بفعلك تفرح شامت وحاقد وحساد=منحت الفرص ناسٍ تروّج نمايمها
ولكن يأهل الحكي زيدوا حكي وش عاد=هل الحكي دايم ماتقضّي لوازمها
مجال الهوى ماعذرب رجالٍ لها أمجاد=مادام إن أبو زيد الهلالي تقدمها
وغيره بشر زادوا على طايل الأعداد=تواريخهم طالت وطابت مكارمها
وألا يانصيب الحب لاتقطع الإمداد=من الأمنيات نفوسنا لاتحطمها
تمنيت ليت إني موظف مع التعداد=على شأن فيه بيوت ملزوم أرقمها
على قربها مع جر سلك الحرير أنقاد=طعون الهوى مناعتي ماتقاومها
من الوقت يكفي بس صدفة بلا ميعاد=ياكم صدفةٍ راع المحبة يعظّمها
| التوقيع |
الأطلال تحكي سيرة الحب للعشاق=ماتنسى مادام إن المعالم توضحها
ليا شفتها سبحت للواحد الخلاّق=عقود الزمن ماغيرت من ملامحها
عجاب الدغيلبي |