السلام عليكم ورحمة الله وبركاته
يالربع عندكم هالمشاركة الجديدة وعساها تعجبكم
قصيدة مسندها للزميل محمد بن خشمان الدوسري
راكب اللي بالمزايا كل أبوها يكملا = ماأشتغل فيه الميكانيكي ولا دخل ورش
جمس حوض مصممينه للخطوط وللخلا = والمكينة لعن أبوها خمس ميه وأحد عش
منوة اللي ساعة التهريب قلبه يصملا = لو طرد وراه جيبات الحكومة ما أبتلش
يعجب السواق يوم إنه يفز و ينتلا = وإن عطيته كل عزمه بارد الحيل أخترش
سايقه لا من بغا درب ٍ عسر ما يبحلا = وإن مشا به فالنفود يشق دربه ما هلش
روحو ملفاك يا ذيبان مزبان ادخلا = صاحبي هداج تيما غيث من جاه العطش
هو محمد هو عضيدي و فالدوامات زملا = هو ولد خشمان من يسمع بفعله يندهش
باني ٍ له بيت عز ٍ للنشاما مدهلا = وإن لفاه اللي مسيّر ينتهض مثل الوحش
أقلط و تلقا محله بالرياجيل أمتلا = والدلال اللي تصب أبهارها هيل الحبش
عطه خطي والفرج بأذن الله الفرد أقبلا = لا فزع قله عن المطلوب يابعد النعش
طالبك مار أنت قلي تم و أمر ٍيحصلا = وما رجع لي خايب المرسول يوم انه طرش
وسلامتكم
سعود بن حادي الدلبحي