مجاراة لقصيدة محمد بن مبارك الدوسري ..
تعلّيت مرقابٍ صعيب على الرقّاي= هبوب الصبا تسهج ركونه زوابعها
بديته ضحى وكهابة الغاربة مضواي=أدوّر ذهيبٍ صاحبي ضم ضايعها
شفاتي بوضحٍ كنها وضح ابن عصّاي=خيارٍ محمد قد عزل من قرايعها
وتعيّفت من محوال رجلي ومن مرقاي=وطلبت الدلال وحضّروا لي توابعها
بدون الثلاث الغايبة مايقوم بناي=ثلاثٍ خوات مجاوب الذيب رابعها
ثلاثٍ من الرسلان رابعهن العوّاي=على جال صلو النار ترخي مخاذعها
وتحايلت شردٍ بين الإرباع والاثناي=محمد بوسمه يوم ياسم مروّعها
غفالٍ ثمنها ينثني دونها الشرّاي=لها قيمةٍ ما كل شرّاي يدفعها
عسى الله يابن زايد يخطريك شر دعاي= على حرث نارٍ فيّ ودّك تولعها
بوجدك على ليلاك ذكّرتني ليلاي=وجرحت لك روحٍ مايهمّك تجزّعها
تشكّى وانا قلبي صخيفٍ معَ الشكّاي=بشكوى غرامٍ بيّناتٍ دوافعها
وانا يامحمّد من ثمان إسْنوات وجاي=جميع الشكاوي قبل شكواك مانعها
بعد ماطويت من الموارد طويل رشاي=والافلام الاولى سامحٍ من متابعها
نبشت المشاعر لين جاء عندها نوناي=وهي هاجعٍ قدّام شكواك هاجعها
تهب الهبايب بالغرايب بدون رضاي=وانا كل شكوى الحب ماودّي اسمعها
لحيث إحتواي الحلّ ماهوب في مخباي=وهوج الرياح العاتية من يصارعها
عسى اللي على قلبك مساويةٍ العرقاي=تزيد الطعون اللي ضمايرك توجعها
اليا شفتها تومي بقلبك هاذيك أوماي=أبارك واقول الحق معها واشجّعها
ولو اعرف عربها كان بشرح لها دعواي=عساها تلمّس لاقرب الطرق واسنعها
عيون الوحيش اللي يتاوق على الهوهاي=على اقصى التّلاع اللي تعلّق مفارعها
اليا كوبر الحفّال يدلي عليه إدلاي=بكفٍّ معاليق الدواغر تمزّعها
ولو عرّضوها اللي لها بالسماء غلواي=تلاشى مسافتها اليا قام يذرعها
على كف شيخٍ جاه مِهْداً عليه إهداي=ابو تركي اللي راية الطيب رافعها
سلالة شيوخٍ مايهابون قطع النّاي=شيوخٍ سلاح الحق ماهوب يمنعها
شيوخٍ يبدّون القِعِيدة على الضوّاي=واهل رايةٍ مايقدر أحدٍ ينازعها
والا يامحمّد كان قصدك تبي فتواي=توقّع ونفسك فالهوى لا تطاوعها
اليا شفت غيداً عودها فوق مثل الياي=يشابه زقار الكنت اطاريف اصابعها
لها هرجةٍ تحيي هشيم الهميد حياي=ولها شيمةٍ عن طامن الحكي ترفعها
عبدالله بن نايف بن عون الرويس