ياسيدي نايف وريث المجد محمود المقام
قصيدة في روح الشهيد بإذن الله تعالى اللواء / عبدالجليل شارع العتيبي رحمة الله رحمة واسعة وتقبله الله مع الشهداء .
ياسيدي نايف وريث المجد محمود المقام=حنا الذخيرة في يديك وكلنا عبدالجليل
حنا عتيبة ماعلينا من خفافيش الظلام=نعلن ولانا للقيادة كل صبح وكل ليل
حنا على عهد الجدود اللي على وقت الإمام= من غابر الأزمان مانعرف بنكران الجميل
تاريخنا ماهوب فوق الأرض من فوق الغمام=وأذكارنا عبر الزمن تروى لجيل(ن) بعد جيل
هذا ولدنا للوطن ضحى ونال أعظم وسام=حاز الشهادة بإذن رب الكون والظل الظليل
عبدالجليل إستشعر الموقف وجود في الحزام=وأقدم على المجرم بحزم وسطر الفعل النبيل
قايد شجاع أثبت تفاني في المهمات الجسام=إخلاص أبو مشعل تجلى والقدم دمه يسيل
الدم ينزف بس في قلبه شجاعة وإحتدام=والرأس يغلي بالأمانة والظفر ماهو ذليل
ولسان حاله قول : مايهناك ياعيني منام=لين أودع المجرم قتيل إيدي ولا آنا القتيل
عز الله إنك نلت مطلوبك وحققت المرام =مامتت لي أشبعت خصمك ذل وأشفيت الغليل
إرقد قرير العين يانسل الرجاجيل الكرام =تغشاك رحمة واسع الرحمة مع الأجر الجزيل
هنا على رتبة لواء رقوك وأولوك إهتمام =وهناك رتبة جنة الفردوس فوق السلسبيل
الله يبيحك ياعظيم الفعل ماهوب الكلام=ويعوضك الله جنة الفردوس ويعوض الزميل
زميلك اللي وقفته عظمى كما الناس العظام=الحارثي والأكلبي ميقافهم ماله مثيل
والشعب كله من شروره ( يام ) لين طريف ( شام )=لو راحت الأرواح من دون الوطن قالوا قليل
وياسيدي نايف وريث المجد محمود المقام=حنا الذخيرة في يديك وكلنا عبدالجليل
راجح المغيري العتيبي