[هلال الدوادمي]

الا يا بحروالله ان فرقا الولايف شيـن
ولا انته ببحرينـي ولا نيـب بحرينـي

غريبين دارك وين وانا ديـاري ويـن
عسى الله يكون بعون كـل الغريبينـي

تلاطم مياهك ضايق الصدر يا مسكين
لعله يروفك من يـروف المساكينـي

يمرك خلي البال ما لـد فيـك بعيـن
وانا ساع شفتك عنك ما حولت عينـي

احس اني اعرفك منول مهوب الحيـن
ولو ان ما من معرفه بينـك وبينـي

اعرف الوجيه اللي نحتها العنا والبين
على قول راع السالفه خبـزة يدينـي

واعرف الدموع اللي على وحده وثنتين
تعلـق بعينـك كنـهـا تاتناديـنـي

اقدر ظروفك وانت دمعك يبـل الطيـن
وانا كيف الومك وانت دينك على ديني

وانا قصتي يا بحر قصه تهز الصيـن
لها في وجيه أهل الكرامـه عناوينـي

لها جرح يبقى في خفوقي ليوم الديـن
أجل عاد وانها قطعه مـن شرايينـي

تبى تشتكي لي غيبة الأهل والغاليـن
انا مثلك اشكي غيبة أهلـي وغالينـي

تبي تشتكي لي حيٍ اقفى مع المقفيـن
انـا ماعرفـت الا وجيـه المقفينـي

تبي تشتكي لي طعنة السيف والسكين
تهايق بصدري وانت تلقى السكاكينـي

واذا كان تاتبكي وتنثر دمـوع العيـن
ترانـي علـى حـد البكـا لا تبكينـي

دخيلك كفايه لا تجينـي بوجـهٍ شيـن
انا اللي لقيته مـن زمانـي مكفينـي

اقوله ويا درب الشقا متعب الماشيـن
على وين يـا درب الشقـا تاتودينـي

ولا يا بحر باكر يجينـا بوجـه زيـن
عسى الله يفرجها علينا قـل آمينـي

سالم بن محمد الحميدي المريبض الرويس العتيبي

آخر تعديل هلال الدوادمي يوم 09-Jun-2011 في 07:39 AM.