هذه المحاورة جرت بعد مزاين عتيبة في الرياض وكان الشعار المتواجدين فيها: رشيد الزلامي وفلاح القرقاح وسالم حزام العطفي وعلي الحصني
قبل هذا الطاروق طلب سالم حزام من ر شيد ان يلعب معه لكن كأن رشيد لم تعجبه بيوت سالم حزام ورفض اللعب معه فقام رشيد وطلب فلاح فكان هذا الطاروق
أتمنى من الاخوان التطرق لمعناه وماحصل فيه:
الزلامي
سلامــي سلام مثل قدح الشـــرار *** اطلعي يانجوم الليل ولا انزلي
ابن ريفة يشوف الليل مثل النهار *** يكوي الشافعي في جبهة الحنبلي
القرقاح
مرحبا ردة للصلح تفتح مســــار *** ابشر بما تبيه الله يخليك لي
خلك الله يبارك فيك صاحب قرار *** مثل عثمان بن عفان ولا علي
الزلامي
انت ياحر يانسل الطيور الحرار *** تعرف السوق رخص السوق ولا غلي
لو نطاوعك فجرنا بقاعة نمار *** طاح من طاح والسالم تلقى الخلي
القرقاح
اعتبرني هذا الليلة معك مستشار *** واقف دونك براسي ومستقبلي
تحسب نجد ياعتيبي مثل قندهار *** دونها حد ابو حدين والفيصلي
الزلامي
يوم شفتك تدير الطايرة في المطار *** قلت روح بها القرقاح والله ولي
والمراجل تراها مثل لعب القمار *** لا تدور لها بالطابق الاسفلي
القرقاح
تعرف اهل اليمين وتعرف اهل اليسار *** ماسمن من حليب الشاة غير الطلي
ياعتيبة ماندري طيركم يوم طار *** يبغي جهينة هل العيص ولا بلي
الزلامي
داري انك تجيب العيد والعيد صار *** يوم مريتني في الخط مستعجلي
والله انا نعرف اهل الحظوظ الكبار *** مار عس الغمام عن الجبل ينجلي
القرقاح
راعي الخلفة اللي مايصر الصرار *** لو حلبها في قوطي جبن مايمتلي
اذكر الله وقدم ساعة الانتظار *** كل قدر على الجمر الكليل يغلي
الزلامي
انت سكتك بيضا ماعليها غبار *** لو احطك بنار حرها يصطلي
تالي الوقت صايرة متونك كبار *** يابن الاجواد وش تشرب ووش تاكلي
القرقاح
كلنا نختبر في صالة الاختبار *** مانزل ديرة الهذلان غير هذلي