[ابن روووق]

السلام عليكم ورحمة الله وبركاته

اخواني زوار واعضاء منتدى عتيبه الهيلا
احب ان اسمعكم هذي المرثيه في
الشيخ ناصر بن فهيد بن ملفي الغربي العتيبي[رحمه الله]
احد مؤسسي هجرة الغربيه [الصوح] الذي انتقل الى رحمة الله
ظهر الاربعاء الموافق 8/5/1426هـ وهي للشاعر خالد بن فيصل بن عبدالله الغربي العتيبي



مرحوم ياريف الديار الفقيره^^^^^ مرحوم ياجدي وانا القلب ملهود
ياصعب لحظات الفراق العسيره^^^^^ وياصعب فرقاكم يابويه علي زود
يابوي نفسي من افراقك حسيره^^^^^ ربيت من كفك مع الوقت ممهود
من علمكم ماعاد اشوف المسيره^^^^^ ولا عاد اميز بين مطوي وممدود
ياصعب علم جا بتالي الظهيره^^^^^ يوم اربعا عندي من ايامي السود
قالوا توفى شيخ ذيك العشيره ^^^^^رمز سما بالصوح فالعلم مردود
في غفلة يالله عسى انك تجيره^^^^^وتمد في قبره رياض بلا حدود
وتجبر عز اللي مالها منه غيره^^^^^وتلطف بناظرها من دموع تزود
اللي معه مبتداها صغيره^^^^^ لين اخلفت دنيا الشقا مبتدا العود
يوم اوقفت في نظرة له أخيره^^^^^ كلماتها والله ماعني تحود
الله ما أصعبها بدنيا حقيره^^^^^ [مع السلامه يابوي] ابصوت محدود
[وداعة الله] فالثوان الاخيره^^^^^كلمة وقالتها وهي ترتجف زود
وتخالفت خطوات رجلي كسيره^^^^^ كن المكان يقول ذا الباب مسدود
مرحوم يامن ماشتكى من قصيره^^^^^ يادامح الزله ويامهفي الزود
مرحوم يازبن الضعيف وخشيره^^^^^ ماتملكه بينك وبينه من الجود
مرحوم ياراعي الكرم في عسيره^^^^^ يوم ان بعض الناس ياجد مقيود
يبكيك دار مابها اليوم نسيره^^^^^ ونجد العذيه والحماده وعنقود
أرض وطت رجلك عليها كثيره^^^^^ فيما مضى واليوم يابوي مفقود
أنا أشهد ان فجوتك عقبك كبيره^^^^^ ماتنرفى يابوي والوقت مجحود
جعل البقا فاللي بهم منك سيره^^^^^ خوالي واهل الجاه والعزوالكود
الله يصبرهم ولو هي مريره^^^^^ ذي سنته ماغيره الحي معبود



واعذرونا على الاخطاء الاملائيه وتحياتي لكم


اخوكم ابن روووق الغربي