هذه القصيده القيت في حفل الشيخ/ سلطان بن ثاعي بن سحلي الذيابي بحضور قبيلة الغوانم من حرب في جده بتاريخ 29 / 2 / 1432هـ بمناسبة زواج ابنه ذيب
ياسامعين القول للقول برهان=الصدق برهان الكلام وعلوّه
وقولن بليا صدق لا شك نقصان=ومن ينطقه ما في ضميره مروّه
يالله يامنزل تبارك والانفال=تزيدنا فالدين همه وقوهّ
يوم الفعول تحط عندك بميزان=والادمي يكشف لخيره وسوّه
رحمتك يالله واسعه كل الاكوان=في يوم ماينفع ياليته ولوّه
من بعدها جات القوافي والاوزان=والشعر بالميقاف شبيت ضوّه
وهاض القصيد وزان شيله بالالحان=وجاني على سرد القوافي جروّه
لا والله الا جيت بالحيل شفقان=وتو القصيد انهال بالصدق توّه
ياحرب حييتو قرابه وضيفان=ياهل الوفا من عهد عصر النبوّه
يامرحبا جيتو لنا انساب واخوان=وتاريخكم بالطيب عالي سموّه
قربكم الله بالمعزه والايمان=على الوفا والطيب طيب العنوّه
يامرحبا في حفلة الشيخ سلطان=اللي تمناه المكارم منوّه
ياكاتب التاريخ سجله باتقان=سطّر حروفه بالفعايل وروّه
وانا هنا بامدحك ياراعي الشان=ياللي على النخوه يجي لك سطوّه
يابو منير الحق ينقال لو كان=على رقبتي بان مثلك غنوّه
سيرة بطل سجل لها الوقت عنوان=يحكي بها التاريخ ليل وغدوّه
ياطيب المجنى ترى الشعر طربان=في مدح شخصك فيه ذوق وطروّه
جمعتنا في شخص واحد الى الان=وحنا على معنى الوفا والاخوّه
ليت الزمن يرجع وندفع له اثمان=ويرجع لنا رجعٍ يفرّحك نوّه
من جملة اقواله قبل عدة ازمان=نصيحةٍ لهل القلوب الجفوّه
قال القوي اللي لياسمع الاذان=قام وذكر ربه وحسّن وضوّه
حازم ليا جات اللوازم كحيلان=واللا الرخا مافيه فينا هدوّه
ياكثر ماحليت واوعدت عربان=واوفيت واصلحت الطريق المتوّه
أشبهك بالغيث من غر الامزان=واشبهك بالبدر لا صفي جوّه
ياجعل ماصابك زياده بالاوزان=اوزان حسناتك وحبيت انوّه
انك ملكت قلوبنا دون حقران=في ربعي اللي مجدهم ماتشوّه
من مدرسة ثاعي تعلم ولاهان=عودٍ عطاه العلم باول نموّه
هذا كلام الصدق من قلب ولسان=وانا لساني للحقايق مفوّه
ياشيخ ابن مصلح ترى الوقت قد حان=واللي تودّه يابيض الوجه سوّه
تكريم ابن ثاعي لنا اليوم عنوان=اليوم لازم نحتفل به ولوّه
ماهو بحاجه مثل هذا على شان =يحرص على المعروف الله لايسوّه
ياحظنا يوم انت منا ياسلطان=وابا افتخر مدام عندي حموّه
وصلاة ربي عد همّال الامزان=على الرسول اللي صدق بالنبوّه
وسلامتكـــم,,,,,,
| التوقيع |
|
التوقيع
محمد الذيابـــي |
آخر تعديل محمد الذيابـــي يوم 16-Apr-2011 في 04:28 AM.