[suoltan]

مساكم الله بالخير

الاخوه الاعضاء

كما وعدناكم وحرصا على رضاكم فلقد تم استضافة العضو الكريم فيصل المسعودي والحق يقال وجدت في هذا الشخص الكريم كل التعاون وكل الحرص منه شخصيا على إنجاح هذا اللقاء واللذي بالفعل هو لقاء صريح وشيق ! عموما لن اطيل عليكم دعونا نرى نتائج التحقيق :





يقال عن فيصل المسعودي بإنه مجامل !! فهو يقوم بالرد على المواضيع دون الخوض في قرائتها ؟ فهل هذا صحيح ؟

يقال يالغالي وياكثر مايقال ولا كن اعلم ان فيصل المسعودي لا يقوم بالرد على اي موضوع إلا وهو قد قام بقرائته قد يقال لان الردود احيانا تكون عاديه فهم يحسبون بذلك انني بس راد كذا مجامل ولاكن يعلم الله ما اقوم بالرد إلا وانا قاري الموضوع ومفصفصه على قولتهم هههه .

كيف علمت بوجود منتدى الهيلا ؟

لو اعلمك واعلم الاخوان يمكن يستغربون لكنها الحقيقه الصراحه جاي يوم ابي اخذ ساعه في مقهى نت ولما خشيت الجهاز وشغلت الكود حق الوقت لقيت الشخص اللي قبلي ناسي لا يلغي الاشياء اللي هو فاتحها ومنها المنتدى ومن ذلك اليوم إلى الان وانا احد اعضاء هذا المنتدى الشامخ .

ماهو المنتدى اللذي تتمنى وجوده في الهيلا والمنتدى اللذي تتمنى إلغائه ؟

منتدى الحوارات والنقاشات لاني رأيته في كذا منتدى واتوقع انه بيفيد الهيلا وبيسفيدون منه خصوصا وانه هناك اعضاء مناقشين ومطلعين ولهم اراء قيمه واما منتدى اتمنى الغائه لا يوجد لانه جميعها فيها حركه .

لديك خمس منتديات في منتدى الهيلا من يعجبك في كل منتدى من الاعضاء فقط ؟

انت تبي تورطنا ولا ايش ههههه كل اعضاء الهيلا بلا تحديد داخلين مزاجي ومعجبيني وجميع الاقسام عاجبتني
<<<<<<<<<< كنه خايف ومتوتر .

بعيدا عن المنتدى كيف تقضي يومك ؟ وماهي هواياتك ؟

والله لو انه يوم وزيرررر يارجال مش الحاااال الصبح فالكليه واذا رجعنا غدوه ثم نومه وفاليل فالنت
يعني وش قالولك يالغالي من الاشغال ولا من الاشياء اللي مشغلتني.

لو ربحت ثلاث تذاكر سفر إلى المريخ فمن ستختار لمرافقتك ؟

والله سؤالك هذا بلشه ياسلطان لكن بختار من المنتدى فواز الشيباني وماجد الهذلي بخليه يجرب بدع الابيات فالمريخ ههههه
والنافذ .

لو ربحت كرسي الرئاسه فالبيت الابيض !! فما اول قرار ستفنده ؟

البيت الابيض مره وحده ياسلطان لو استلمت كرسي البيت الابيض

اول قراراصدره أخليك المتحدث باسم البيت الابيض هههههه واقالة كولن باول لانه دابل كبدي وسجن رامسفلد لانه رافع ضغطي .

برأيك من الاكبر بنظرك البرتقاله ام التفاحه ؟ ولماذا ؟

شكلك متأثر بقنوات الفيديوكليب يالغاااااالي.

حكمتك المعتاده فالحياة ؟

لاتؤجل عمل اليوم الى الغد.

سيرتك الذاتيه ؟

اقول لا يكون شغال فالاحوال ولا ندري
الاسم :
فيصل منيف زيد المسعودي النفيعي العتيبي
العمر :
19 سنه
مكان الاقامه :ا
المنطقه الشرقيه - محافظة الأحساء
العمل :
طالب في كلية المعلمين بمحافظة الأحساء - لغه عربيه

كلمه اخيره في هذا اللقاء ؟

اولا اشكرك يالغالي واتمنى ان نكون عند حسن ظن جميع اعضاء هذا الصرح .





واخيرا

اتمنى ان يكون الحوار في مستوى تطلعاتكم .

كل ماعليكم هو طرح الاسئله للأخ فيصل المسعودي وهو سيجيب عليها ومن ثم اختيار ضيف الاربعاء مابعد القادم وكذلك التصويت للقاء هذا اليوم علما بأن الدرجه الكبرى هي 5 والصغرى والعياذ بالله 0 وللمعلوميه سوف يقوم الاخ فيصل بالاجابه على اسئلتكم واستفساراتكم إلى يوم الاربعاء القادم ومن ثم سيقفل اللقاء للمباشره فالضيف الاخر .

للمعلوميه :

ضيف الاسبوع القادم سيكون الاخ والراوي سعدون الهرس مدير منتديات عتيبه !

تحياتي للجميع وارفقوا على المسعودي بالأسئله .