[ضاوي العصيمي]

هذه القصيدة القيتها في حفل حمود بن هليل العصيمي
بمناسبة مشاركته في مهرجان ام رقيبه لعام 1432 هـ

سلام الله سلامٍ له طعم سكر وريح قناد=وله نوض البروق اللي تكاشف في مخايلها
يعم اللي حضر في محفلٍ جيته على الميعاد=من ضفاف الخليج ودرة الشرق ومعاملها
من اجل حمود سقت الرجل لو ان الدروب بعاد=علي حقوق لهل الطيب وابسطها مواصلها
البي دعوة اللي ماجنح عن منهج الاجداد=يقلط فى الصحون الحيل والميله يعدلها
كريمٍ دينٍ شهم شجاعٍ يدحم الاضداد=وعقب له حراراً للملا بانت فعايلها
نشاما من نشاما وارثين امجاد عقب امجاد=شغاميم العيال اللي عزيزاتٍ مراجلها
ابا امدح طيبين الصيت ماهموني الحساد=اقول الصدق والصدق النفوس السود يزعلها
تنهض ياقصيدي والمعاني والحروف جداد=وهات من النوادر والبيوت العوب وافتلها
انا خابرك لك عاده تنومسني وانا معتاد=انومس لابتي من فضل ربي يوم امثلها
اعدي فى المنصات المنيفه وامدح الرواد=ملوك بلادي الهم ندر القيفان واجزلها
واشيد بكل شغمومٍ كريمٍ ساعده وراد=من الهيلا .. وشجعان القبايل ماتجاهلها
واثمن كلمتي واسبر طريقي قبل لابدا الماد=وكل الواجبات اليا احتمى الميقاف اكملها
ورجلٍ مايكمل فى اللزوم اطيب له المقعاد=يريح ويستريح وللمنابر من يجملها
كبيرات المحافل تفرق الشاعر من القصاد=وفي بعض العرب لابدها تعمل عمايلها
بعضهم من غشامه ينحدر لوهو يبا المسناد=يركب قافيه واللي ورى القيفان يجهلها
وبعضهم من ردى حضه يتوع ويبهت الاجواد=ليا لاحت له الفرصه عباد الله تورسلها
نعق له كم منافق وهتفوا له وانخدع وانقاد=وقام يمس عمره ويتحمى لين طبلها
الا يابن الحلال اللي طمرت العقم يكفي عاد=سئمنا من كثير البلبله واللي يبلبلها
ترى الموروث سامي والاديب يراعي النقاد=ومن سمع القصيده ينكشف له فكر قايلها
تمهل وانتبه واحذر تزل ويصعب المعواد=وحلل كلمتك قدام لاغيرك يحللها
اقوله والمعاني صيد والشرهه على الصياد=ورجل مايصيد الشرد عن متنه يحولها
يخليها لراعيها ويسلم من غزا مافاد=وانا اضمن له ليلقى غيرها مهنه يزاولها

التوقيع

يسعدني زيارتكم لصفحتي على تويتر على هذا الرابط https://twitter.com/#!/dawi_1 وياهلابكم جميعا