السلام عليكم ورحمة الله وبركاته
مساء الخير
أبو زيد الغبيوي:
ياسلام الله وابارك للزميل اللي دعاني=دعوتي واجب عليه وجيته واجب عليه
كل شاعر وده يغني من جزال المعاني=والمعاني سهم خافي بين هذيه وذيه
علي الحصني:
مرحبابك من جبل دخنه ليا ضلع حلباني=مثل ريح العود والجاوي وطعم الشاذليه
انت ابو زيد الهلالي بس دور لك حصاني=واغز ربع(ن)يطبخون الجايده في جلد نيه
أبو زيد الغبيوي:
بارك الله بالعميل اللي بنا زين المباني=ماتزعزع لو تهب الها الرياح الموسميه
وانته الحصني من رجال(ن)حشام ولاتهاني=اغز للي عقبولك باخر الدنيا قضيه
علي الحصني:
الشجاعه شي ثاني والسياسه شي ثاني=كان ما انته جامع الثنتين مشكلتك قوويه
يالغبيوي ما غدالي شي من ماض الزماني=اتغدى لي ضحيه واتعشى لي ضحيه
أبو زيد الغبيوي:
السياسه عند ابو متعب وباقين الخواني=وانت شاوي طول عمرك من قطن لاقصى طميه
انت ودك بالعشى لكن موت الروح داني=كيف تسلم من مخاليب الحرار الصيرميه
علي الحصني:
يامحمد خلها دله بهيل وزعفراني=مانبا نفرك جنوبك بالمياه المعدنيه
الله أكبر يازماني شال مني ماعطاني=بس أجي واروح بين مقيطره والفيصليه
أبو زيد الغبيوي:
وانت عندك سالفة هذاك وفلان وفلاني=السنع معطن نحيه والجهل معطن نحيه
لو هي بكيفي لارقيكم على زين المكاني=مير لاتشره عليه بعد طارت من يديه
علي الحصني:
العرب تاكل وترقد والشحم ملي الصياني=وانت يابو زيد ريح لاشداد ولامطيه
انت رجل ونيتك زينه وعلمك ماخفاني=دام طارت من يديك العفو عند المقدريه