علي فلاح العضياني
المدارك وسيعه و الهواجيس حرّه =يا سلامي على الهيلا كثير السلامي
يقنع العبد بالمقسوم خيره و شره=لا يقول الجذع سلطان مدري علامي
سلطان الجـذع
والقرايح لها في بيد الافكار جرة =مرحبا فالمقام اللي يسده مقامي!!
يضحك الوقت في وجه الغرير ويغره = لين يطوي صميله في دروب المضامي!!
علي فلاح العضياني
الليالي لها طعمين حلوه و مرّه=وأنت لو تطعم النوعين تطعم كلامي
الجذع ينعرف سنّه بعد ما نفرّه=شهر عاشور يصبح له 30 عامي
سلطان الجـذع
كان علمك ذهب محفوظ في وسط صره = في بلدنا يباع وفي بلدنا يسامي!!
القمر لو يغيب ويستقر بمقّره = عن حجى النور من يطرد فلول الظلامي!!
علي فلاح العضياني
كل واحد يلومك يالجذع و يتشرّه=بعد عرّضت نفسك للعتب و الملامي
يوم غاب القمر بانت نجوم المجرّه=و القمر كل ليله يدّرق فالغمامي
سلطان الجـذع
يسري الليل ابن ثعلي ومكشوف سره = نظرةٍ للشداد ونظرةٍ للخطامي!!
ماانت لاقي من المحصول مثقال ذره = بينك وبين شفك طلقةٍ من حزامي!!
علي فلاح العضياني
الحضر في رفاهيّه بفندق مسرّه=و البدو في سمايم نجد و القيض حامي
للمصايب على سلطان كرّه و فرّه=لين عينه تبرّى من لذيذ المنامي
سلطان الجـذع
لايهمونك اللي طرح فوق الاسرّه = بعد ماجيت عند الهاجري والزلامي!!
لا ضرر كان ما ربي كتب لي مضره = لو دنياك ميسمها على النار حامي!!
علي فلاح العضياني
وصّل العلم إبن عساف ياللي تمرّه=لا يغنّي بطاروق الهوى و الغرامي
الجذع ينقرص من جحر عشرين مرّه=ما يحلّل حلال و لا يحرّم حرامي
سلطان الجـذع
الجريح لهوى الغربي يفك الازره = مايعرف الشراب ولايعرف الطعامي!!
تدري ان الليال اغلاطها مستمره = بندقٍ ماتحيد عن الهدف فالمرامي!!