الحظ يلعب مع البشر لعب حرّيف=ولاّ معي من لاعبين الرديفي
أحدٍ رقى من لعبة الحظ ومنيف=وأحدٍ نزل في قاعٍ أجرد نظيفي
ماهي بحرب ولا شطارة عواريف=أرزاق من ربي وربي نصيفي
كل شي على الله رغم جو العواصيف=ما هزني بفضله عجاج المصيفي
ثابت جبل لو ناسي راحوا مناكيف=عنهم بذكره جو صيفي لطيفي
ربي عطاني تجربه بالصواديف=وأعرف عدوّي وأدري منهو وليفي
آخذ من الفرصه بحجم المغاريف=وما فاتني ما قلت لاواحسيفي
ماهمني هرج الضعوف الملاقيف=ولاني ليا طالت كتوم وضعيفي
أعطي ولا أحسبها لصديقي تكاليف=والخصم له لا جات حد الرهيفي
دربي مع الطيّب جميل ومعاريف=ولاّ الردي بالدرب ما هو حليفي
وحظوظي لو ماجات يمي على الكيف=الحمد لله لو ماجتني بكيفي