السلام علاكم 
أخطيت والعاقل يعدّل خطاياه = مْن الخطأ ما فيه نفس مْعَصومة
أكبر خطأ طاوعت قلبي و سوّاه = يوم إنّي أعمّر بيوت مهدومة
يخدعني الصاحب بضحكة ثناياه = و أزوّد همومي و أخفـّف همومه
لين الزّمن ردّه و حدّه على اقصاه =عيّت سلومي لا توافق سلومه
حرصي على اللي تبهج الصّدر لاماه = مالي ومال اللّي تردّت عزومه
قرّرت توديعه بغمــْره وحـنــّاه = أنا بـْدوي ما فيّ ذرّة نعومة
بعت الرّخيص بْلاش والحمد لله = حصّلت لي في السوق خبلٍ يسومه
خبلٍ شرى له خبل مثله وشرواه= الله يلوم اللّايم اللّي يلومه
علقة وأكلناها و درس وفهمناه = ما فات مات ولا نجدّد رسومه
الوقت ما يرحم ليا حدّ شلفاه = يصحّي الغافل من اعزّ نومه
والصّاحب الغالي عسى اللاّش يفداه= طاريّ طاريه و لزومي لزومه
ذِكري يماري به و يطلق محيّاه = يا جعل يومي ينكتب قبل يومه
والاّ الضّعيف اللي صفاته محنّاه = ذِكري يسبّب له على الكبد لومة
قسمه ومقسومه و حقّه و ما جاه = من دون لا ندخل معه في خصومة
اللي ليا منـّه هَرَج حكّ علباه = غـَدِّه ولا تأخذ جدايد علومه
لو إنّ ما فالأرض غير أنت و ايّاه = إرْمه وكفّن صحبته في هدومه
والاّ أتركه و تجيه ناسٍ تلقـّاه = من نفس قومه والاّ من غير قومه
اليوم حتى الذّيب يرعى مع الشّاه = ما أقول غير الله يعزّ الحكومة
تحيااااااااتي .