ابراهيم الجـــــذع
الليله الليله نبا المعنى مثل وبل الرصاص=والنيص ما نشفق عليه ولو اشوفه ما اقنصه
مال الجروح اليوم يا مرزوق يا كود القصاص=والحبل فالغدرا يروع من هو الداب اقرصه
مرزوق حمدان العتيبي
هات الثمينه ياقوي المعرفه كب الرخاص = لن الرخيصه ماورى من جابها الا المنقصه
المعذره ياصاحبي لو صار بالوضع اختباص = وانتم نعم ياصحابنا لو فيكم شوي حرصه
ابراهيم الجـــــذع
حنا نعرف الجمره الحمرا من التمر الخلاص=واللي يحب الغاليه يا صاحبي ما نرخصه
الناس حسب الدرس يا مرزوق تلقا الأختصاص=لكن بعض الناس ما يعرف نظام الخصخصه
مرزوق حمدان العتيبي
انتم نشاما مالكم عن طيّب الوقفه مناص = والوقت لو شح بعطاه.. ايدور وتجيك فرصه
لا تامن اللي يدفعك وان جا.نهار الجد حاص = ماعنده الاّ يابراهيم الفتن واللصلصه
ابراهيم الجـــــذع
يا ربعنا العتبان للوقفه ترا مفراص ماص=اللي يجيب العلم والكايد يجيه ويفرصه
مال الفرص يا صاحبي مرزوق غير الأقتناص=لو كان ما نتبع هل التطبيل واهل الهنقصه
مرزوق حمدان العتيبي
خلك على العليا قوي عزوم .. عزمك عزم شاص = وان جالك اللي ممتلي راسه طفاقه شنقصه
الكايده يبغالها تركيز وشوي احتراص = الصاحي بيثبت وجوده والمريض انشخصه
ابراهيم الجـــــذع
اللي يبا يضرب تهاتيه الخلا من فوق باص=ما هو موديه الخلا لو الجنوط مرصصه
المشكله من واحدٍ تبرق سبيت يجيك هاص=لو أن ماله عن حقايقها محيص وفرفصه