خلف المطيري
مرحبا ترحيبتن متّساهلـه لاقصـا مداهـا=ماتبرق فـي كـلام المشرفيـن ولاتـرده
ماهو اسّتهتار لكن عارف الكف وعطاهـا=كان نسّيوا مانسيت اللي حصل من قبل مده
معجب العتيبي
البقا والناس ليت الله على الحسنى هداها=ياخلف وشلون ماترضا العطا وانته تمـده
مد طيب وهاك طيب وخل خلق الله وراها=وان لقيت الطيب ماهو عيب يوم انك تعده
خلف المطيري
انت يامعجب سياسي تذبح الناس ابّدهاها=كيف اباخذ منك حقّي وانت جدك جد جده
ماذخرنا عنك حاجه والعرب هذا بلاهـا=كل مابّني بيت للعتبان فالمعـول تهـده
معجب العتيبي
نعمة العقل الكبير تروع اللي مالقاها=مايصيب الكف غير اللي يبين حيد خده
ضاع صيده في عجاجه واحدن عينه تراها=نفسه اللي للقليل من الشفاحه جت تحده
خلف المطيري
انت همّك فالحكومه ماتبا شقرة عصاها = لو تحسب احساب ذنبك ماتصكر خط جده
ابتلشنا فيك والاقدام بثّتني حفاها = نوب اسند لحلبان ونوب احدر للمصده
معجب العتيبي
ابن حنبل قال كلمه ماعتقد مثلك نساها=دعوتن وحده وتقبل للرجال اهل الاشده
كان منته قد حملك ياجمل جنب سماها=لاتدور درب منته ياجمل بالحيل قده
خلف المطيري
الشريعه ماتوافق نهجهم واحلف علاها = كم واحد من سببنا بينت فأشواه غدّه
ليش اعلمها واوضّح خلها علي عماها = من يضد الحق | باكر كل خلق الله تضده
معجب العتيبي
انت ماتدري عن الخافي ولاتبحث خفاها=ياخلف من لايودك منت مجبورٍ توده
كلمة المسلم على المسلم تبين في صداها=النصيحه والمعونه والسلام اللي يرده
خلف المطيري
الهوي غلاب والعشاق يحّكمها هواها = منت فاهم لو افك الباب يامعجب واسده
يامشالله صرت خيّر وانته امنول تباها = ماخبرتك يالحكومي ترّخي الحبل وتشدّه
معجب العتيبي
كل نفس ومبتغاها كل نفس ومبتغاها=لو يزود الهرج يارجال معجب منت نده
سكة الهادي محمد ماندم رجلٍ مشاها=علم بيّن ياخلف لكنّ ود العلم وده