الله على نجد ونسايم هواها = والله على الممشا بهاك المداهيل
الديره الي مانسينا غلاها = الديره الي جعلها للهماليـــــــــــل
من رايح يروي بوبله ضماها = يسوقه المولى على نجدوتسيل
تلقى بها النفس العليله دواها = بين العبال وبين هاك الاقاذيــــــل
وشعابها وهضابها مع حصاها = وجبالها وحزومها والغراميـــــــــل
اليا طرت جادت عيونى بماها = اي والله ابكيها واجر المواويـــــل
واحبها والقلب يعشق ثراها = حبن رسخ ماهو دعايه وتمثيــــل
من الصغر قلبى تعلق هواها = ياليل قمت امشى مماشى الرجيل
وكبر بقلبى والعروق ودماها = ولاعاد ابدلها وادور منازيــــــــل
مدهالن يوم السنين وغثاها = من دونها نثنى على الجيش والخيل
من غيرنا يوم الحرايب حماها = هيلا لينهالت تضد الحلاحيــــــل
هيلا يعود بالندم من غزاها = بحد السيوف القاطعات المصاقيل
يالين نزحنا جموع تباهــا = وبقت لنا بالغصب جيل وراجيـــل
وفلت وشربت من ينابيع ماها = بوسم يخلد لاخر الوقت مازيل
اقولها يوم السنين وعناها = حطت لنا بالبعد قيد ومحابيل
غصب ابعدت رجلى وساقت خطاها =يم الشمال وحال ميل ورا ميل
مسافه تتعب قدم من مشاها = تحدنا الاردن ودوله اسرائيل
صحيح بارض المملكه وبذرها = لكن نجد فراقها مر بالحيل
وجدى عليها مع نسايم هواها = وجدى على المشابهاك المداهيل