[نواف زاحم الدلبحي]

اخوى هذا جهد كبير تشكر عليه

ولاكن ودى تصحح البيت

لين اضبط البراد واكل اعلاجي
البيت الي قاله بندر وهذا ارويه عن خويه طول السنين سلطان النحاوى

لين اشرب التنباك واكل علاجي



ولي بينهم مراد كثير ومنها



بندر بن سرور

رسمتلي مع طلعت الشمس خطه 00 وبليل غيرنا تجاه الخريطه

اشيل بميزان الروابع وحطه 000 الله من بحرا قطعنا محيطه
انا الذي قاسيت راحه وشطه 00 وبحلت بيامي وثرها بسيطه
ما يطلع القرناس من عش بطه 00 والجبو مايحيي النوامي شفيطه
لاصار من ربعك أقيشر ونطه 00 هز المحاله لين يفرد شريطه
تراه ما ينفع عساها تلطه 000 خيال دجا مثل عنز الربيطه



000 000 0000

فرد عليه النحاوي


عزاه ياقلبا بلا الروح عطه --- ينقط على معلوق قلبي نقيطه
من فعلها الآيام شيله وحطه --- اصرف وجمع والليالي محيطه
كم مرقبن في عالي الرجم أنطه --- لكن على المحوال عسرن هبيطه
كم خايعأ خالن خلاوي يعطه --- من فوق فرتن يوم تسمع شفيطه
نوبن ورىثمود ونوبن بقطه ----ونوبن ورى نزوا ونوب بشبيطه

صبرك على نفسك بدارأ أقشطه --- أخير من شوف ألوجيه البليطه


وهذا لقا مع النحاوىضيفنا في هذا اللقاء هو الشاعر سلطان بن مهنا النحاوي الرشيدي
شاعر عندما تستمع له تشعر بأنك مع شاعر لايقول إلا البديع والجزيل من الشعر .
هذا الشاعر عاش هو وكل من الشاعر حمد بن هادي المسردي والشاعر بندر بن سرور في فترة واحدة .
بل كانت هناك علاقة وثيقة تربطه معهم , يحمل هذا الشاعر قصص نادرة وأشعار نادرة نتمنى أن نزودكم بها في المستقبل .


أجرينا معه هذا اللقاء ونعد القارئ الكريم بأنه سيكون هناك لقاءات أخرى مع هذا الشاعر .

س : أبو غانم أنت شاعر من فئة الكبار لكن وجودك الإعلامي شبه معدوم ماهو السبب في ذلك ؟
والله أنا موجود واللي بيبحث عنا بيلقانا وسبق وأن عملت معي مجلة أصداف لقاء وتم نشره .

س : طيب هل في أولادك من أخذ الشعر وراثة منك ؟
والله إلى الآن ماشفنا شئ لكن نقول إن شاء الله إن فيهم اللي بيقول الشعر الجزل الطيب .

س : أبو غانم ودي تروي لنا وللقارئ الكريم قصة سجنك في عمان أنت والشاعر حمد بن هادي المسردي ؟
والله يابو مريع في آخر التسعينات هجري رحت لأبوظبي وقابلت رجل من خوياي اسمه منير العتيبي ومنير هذا يعرف الشاعر حمد بن هادي وعرّفني عليه ولقيتهم يبون يروحون لليمن يهربون بُن عاد أنا اشتريت ونيت ونويت أخاويهم وكان الوضع تهريب المهم هربّنا من اليمن ثلاث مرات نحّمل البن ونبيعه في نزوى في دولة عمان رابع مره وحن في نزوى أنا والشاعر حمد بن هادي والحميدي العبيدي ومنير العتيبي كنا نتغدى في نزوى وعلينا عج إلا والدورية محوطين علينا . دخلونا السجن وحكموا علينا بثمانية شهور سجن دخلنا السجن وسمعت انه فيه رجل ظابط اسمه محمد صديق ارسلت له قصيدة وأطلب فيها منه إنه يتوسط في إطلاقنا , الرجال رد بمنطوق ماهو بطيّب وقال ماعلينا نقص بدو أنتوا بدو ومكانكم في السجن , سويت فيه قصيدة بعد كلامه هذا فزوّد عليّ الحكم شهرين صرت محكوم بعشرة شهور . الحين ابتلشنا , وبعدها سمعنا برجل فيه خير يقاله علي البريدي برتبة نقيب وأرسلت له قصيده انخاه فيها الرجل ماقصر قال بطلعّكم بس على شكل فردي يعني الإسبوع هذا واحد والإسبوع الجاي واحد وعلى ذا الحال حن والله رفضنا وكل منا يقول ماني بطالع وتاركم وراي .
شافنا البريدي نرفض الخروج متفردين فقال : أجل ثمن قصيدتك بشيل عنك الشهرين اللي حطها محمد صديق .
قضينا المدة وطلعنا من سجن عمان وتقابلت بعدها أنا وحمد بن هادي الله يرحمه ويغفر له مره وحده في أبو ظبي .
وبعدها ماعاد قابلته إلا إنه من الأشخاص اللي أعتز بمعرفتهم وأتشرف بها .

س : طيّب ودنا تعطينا يابو غانم قصيدتك وقصتها اللي في جارك اللي شكاك عند الشرطة ؟
هذا جار لي درس في إمريكا وتأثر بهم وعوّد من عندهم ومعه كلب الله يكرمك ويكرم القارئ مشتريه من إمريكا الشاهد إني استأجرت بيت قريب منه وبجنبنا مسجد المهم كنت إذا طلعت من المسجد أعزم جيراني للقهوة ويعزموني مثل مايتعازمون النشاما بينهم بين.
المهم الجار هذا إذا عزمته يصد مني ولا يكلمني لاهو باللي يدعي لي بالغناه ولاهو باللي يقلط للقهوة.
المهم أنا بنيت خيمة في حوش البيت ودايم نصلح قهوتنا فيها وتعرف النجر ودندنته له صوت مسموع وعاد صوت النجر بحد ذاته كيف عند هله .
المهم كان عندي ذاك اليوم نشاما يتقهوون إلا وجرس البيت يدق طلعت للباب إلا عند الباب عسكري من الشرطة اقلط ياولد قال : الله يسلمك أنا جايك أبيك تخاوينا للشرطة قلت : عسى ماخلاف قال : موضوع بسيط قلت : له لاحقك للمركز استأذنت من ضيوفي ورحت للشرطة إلا وذا جاري عند الظابط أنا شفته وقلت أكيد إنه صاير عليه خلاف سلامات ياجاري عسى ماشر ياجاري وهو مير يتصدد مني قال : لي الظابط يا سلطان جارك يبي كفالتك قلت : ايوالله بكفله قال تراه في مبلغ 75000 ريال قلت : هي عزوة وانا عند عزوتي قال : الظابط سلامتك ياسلطان جارك مشتكيك يقول : إنك مزعجه بناقوس عندك يقصد النجر قلت : هذا ماهو بناقوس الناقوس لليهود والنصارى لكن اسأله وش اللي عنده دام إنه يسمى النجر ناقوس .
قال : الظابط وش عندك يافلان قال : ماعندي شئ . قلت : إلا عنده كلب وديك وكلها مزعجتنا وحن حاشمينه لأنه جار قال : هذا كلب امريكي مشتريه بأربعة ألاف ريال والديك رومي مشتريه بألف ريال .
عاد قال : الظابط دام إن هذا علمك روّح يالنحاوي جعلك ماتشوف شر وجارك خل شغله عندي .
سويت لي بيوت في هالقصة ماعادني بلازم منها إلا أربعة بيوت.
أقول فيها :

يانجرنا من شان جاري هجرناك = أخاف يزعل جارنا يوم يوحيك
أخاف تزعل جارنا الصبح بعواك = حيثه ماهو بمن لابة تعتني فيك
وجداه ياوجداه يالدور هذاك = يوم الرجل في مجلسه يفتخر فيك
ماهو بجارٍ يشتكيني ليا اوحاك = سلط عليك الوقت ما اقشر بلاويك

س : أبو غانم أنت من الأشخاص اللي كان لهم علاقة وثيقة مع الشاعر المرحوم بإذن الله بندر بن سرور , هل بالإمكان أن تروي لنا بداية معرفتكم مع بعض ؟
والله أنا تعرفت على المرحوم بندر بن سرور في الكويت وكانت علاقة وثيقة وكانت في السبعينيات ودامت معرفتنا وعلاقتنا حتى مات الله يرحمه .

س : أبو غانم فن القلطة ما مارسته ؟
والله أنا كنت ألعب القلطة لكن ماواصلت لمشاغل الحياة واتجهت للنظم وواصلت ونسأل الله التوفيق .

من لفت نظرك من شعراء المحاورة ومن شعراء النظم؟
الحقيقة شعراء المحاورة القدامى أكثرهم شعار من الطراز الأول ومن الجيل الحالي يعجبني الرياحي وابن شايق والقرقاح
وكلهم فطاحلة نظم ورد وابن ريفه بيته من اشهر بيوت الشعر وعلى ساس في الشعر من قديم العصور
وفي النظم أشوف إن الشاعر سعد بن جدلان شاعر متميز لأبعد درجة.





وسلامتكم