ابدى بذكر مفجر الصخر ينبوع=رب حمى عبده بنصره واجاره
وانظم بيوت بينها الورد مزروع=واختار من قول النشاما خياره
بالصدق اقول الحق والكذب ممنوع=والمدح فاهل الطيب ماهو خساره
سلام ياشيخ له الرأي مسموع=اميرنا وتليق فيه الأماره
شيخ فعوله تجعل الرأس مرفوع=يوم البلاد حروب مسرج مهاره
من روس قوم تعسف الصعب ويطوع=قوم لهم تاريخ مجد وحضاره
بيدينهم سيف من الهند مصنوع=عمهوج رمز للقبيله شعاره
فعله يخلي طاغي الرأس مقطوع=يوم زند الحرب يقدح شراره
بين القبايل يوم طامع ومطموع=طريحهم ماحدن ينادي بثاره
من دون ذودن دونها الدم مدفوع=من دونها يسقيه كأس المراره
وله مجلس بالطيب والعز مشفوع=مشرع للضيف ليله نهاره
يلقى بها الطرقي ملاذ عن الجوع=ودلال رسلان على جال ناره
وسلام للعضيان مثني ومربوع=الآد عاضي كاسبين النماره
لكم علينا حق واضح ومشروع=ياربعنا حق علينا الزياره
حق علينا نوفي الكيل والبوع=في حقكم ياكاسبين الكباره
لعلكم دايم على العز والطوع=وقانونكم مايختلف عن مساره
ياعزوتي لن داحم الكوع بالكوع=وتقارعت جيش المعادي بغاره
شجرة عزاز من اصلها تنبت فروع=والفرع يم اصله وجذعه قراره
وصلاة ربي عد ماخط مطبوع=واعداد مابان الجدي في مداره
على نبي في هدى الدين متبوع=اختاره الله من عباده واجاره
| التوقيع |
للتواصل عبر twitter تويتر
al_bargawy@ |