ابراهيم الجـــــذع
اليا خذينا معك طاروق والجو كايف والهدف راق=سوق الجمل مع من يسوقه اليا خذينا معك طاروق
جاك الخبر وأنا ولد روق نبا نعلقها بمعلاق=والغيث لايحةٍ بروقه جاك الخبر وأنا ولد روق
معجب العتيبي
اليا لعبنا معك ياذوق نرضي هل المعنى والاذواق=والقاف مانخلف طروقه اليا لعبنا معك ياذوق
كلٍ معه قدره ومنطوق يالتاجر اللي طب الاسواق=والرجل مايجهل حقوقه كلٍ معه قدره ومنطوق
ابراهيم الجـــــذع
شاركبها بمزاين النوق يا اللي تسوق اطوال الاعناق=اللي يبا يبرز بنوقه شاركبها بمزاين النوق
وشلون ينزل داخل السوق اللي بدون اثبات واوراق=واللي يبا يخفي عموقه وشلون ينزل داخل السوق
معجب العتيبي
القلب ضخ الحب فعروق وقنيتها من زود الاشواق=والادمي ماباع شوقه والقلب ضخ الحب فعروق
الادمي من طين مخلوق واللي عطاه العقل خلاق=واللي فقد عقله يعوقه والادمي من طين مخلوق