تركي الميزاني
اشوف شاهر يلتفت بالعين ويعط الصياح = قام يتونش له علوم ٍ مايحسب حسابهـا
لكنّ ماله عندنا غير المشوك والسـلاح = واللحية اللي ماتحشمنا نقص اشنابهـا
شاهر العنزي
ياطير ياطير السعد ياللي ترفرف بالجناح = ترى المنية واحده ماحد ٍ يعرف اسبابها
السالفة بيني وبين اصحابنا مالك صلاح = احسب حساب الوالمه والنار من شبابها
تركي الميزاني
بعض السوالف مانعديها ولافيها سماح = وانته سباع الليل في دربك تحد انيابهـا
انتم طمعكم زاد عن حده مسا والا صباح = والناس ماتلبس ثياب ٍ ماتصير ثيابهـا
شاهر العنزي
ان كان وكلك الدويش وثم سلمك الوشـاح = اعلمك في قصة الرجال وانـت ادرى بهـا
ترى الطمع عند العرب لاصار بالطيب مباح = المدرسة ماغاب غير اثنين مـن طلابهـا
تركي الميزاني
انته رحلت ولابقا لك لاحـلال ولامـراح = واليوم تنظر في جمالٍ وسمهـا برقابهـا
افلح ياشاهر واتعب الاقدام في درب الفلاح = قدام تكبر شرهة الاصحاب فوق اصحابها
شاهر العنزي
ترى الحقيقه عند صاحبها لو ان الوقت راح = انشد حضور القوم وتعلمك عـن غيابهـا
ابشرك ياصاحبي مطـاح ماهنيـا مطـاح = ترى النشاما ماتشره لـو يطـول عتابهـا
تركي الميزاني
ترى طلوع الشمس ميعادك على العد القراح = ترضى بها والا عساك تروح ماترضى بهـا
انته تحب العافية والا تبـا السـم الذحـاح = اختار بين امرين والدعـوى نسكـر بابهـا
شاهر العنزي
هل تعلم انك في زمان العولمه والانفتـاح = لاعاد تحسب شرهة الدلة علـى صبابهـا
ترى السحابة جاك راعدها وفيها البرق لاح = وشلون تكماها بعـد ماسيلـت بشعابهـا
تركي الميزاني
حنا تراهنا ماتحركنا ذعاذيع الرياح = وانته ليا هبت ذعاذيع الرياح تهابها