[ابو ضيف الله]

قصيده الامام تركي بن عبدالله ال سعود المؤسس الثاني للدوله السعوديه رحمه الله

طار الكرى عن مـوق عينـي وفـرا =وقزيت من نومـي طرالـي طـواري
وابديت من جاش الحشـى مـا تـدرا= واسهرت من حولـي بكثـر الهـذاري
خـط (ن) لفانـي زاد قلبـي بـحـرا = من شاكي(ن) ضيم النيـا والعـزاري
سر يـا قلـم واكتـب علـى ماتـورا =ازكا سلام(ن)ل لابن عمـي مشـاري
شيخ (ن) على درب الشجاعه مضرا(ن) = مـن لابـه يـوم الملاقـا ضـواري
يامـا سهرنـا حاكـم(ن) مايـطـرا =واليوم دنيـا ضـاع فيهـا افتكـاري
اشكي لمن تشكـي لـه الجـود طـرا = ضراب هامـات العـدا مـا يـداري
ياحيـف ياخطـوا الشجـاع المضـرا = في مصـر مملـوك لحمـر العتـاري
من الـزاد غـادي لـه سنـام وسـرا = من الذل شبعان ومـن العـز عـاري
وش عاد لـو تلبـس حريـرن يجـرا =ومتوجـا تـاج الذهـب بـالـزراري
فدنيـاك يبـن العـم هـذي مـغـرا =ولا خير في دنيـا تـورى النكـاري
تسقيـك حلـو(ن) ثـم تسقيـك مـرا =ولذاتهـا بـيـن البـريـا عــواري
اكفـخ بجنحـان السـعـد لا تــدرا =فالعمـر مايقـاه كـثـر الـمـداري
مافـي يـد المخلـوق نفعـا وضـرا =ما قدر البـاري علـى العبـد جـاري
واسلـم وسلمـي علـى مـن تــورا =واذكرا لهم حالي ومـا كـان جـاري
ان سايلـو عنـي فحـالـي تـسـرا =قبقـب شـراع العـز لوكنـت داري
يوم ان كل رفيق ٍ من رفيقه إتبـرّا = حطيت أن لجرب رفيقاً أمباري
نعم الرفيـق اللـي صطـا ثـم جـرا =يـودع مناعيـر النشامـا حـبـاري
رميـت عنـي برقـع الـذل بــرا = ولا خير في من لا يـدوس المحـاري
يبقـى الفخـر وانـا بقبـري معـرا =وافعال تركي مثـل شمـس النهـاري
احصنت نجـد عقـب ماهـي تطـرا =مصيونـه عـن حـر لفـح الهـذاري
نزلتهـا غصـب(ن) بخيـر وشــرا =وجمعت شمـل(ن) بالقرايـا وقـاري
والشرع فيهـا قـد مشـى واستمـرا =ويقرى بها درس الضحى كـل قـاري
زال الهـوى والغـي عنهـا وفــرا =ويقضي بها القاضـي بليـا مصـاري
وان سلت عن من قالي لـي لا تـزرا =نجد غـدت بـاب(ن) بليـا سـواري
ومـن امـن الجانـي كفـا ماتـحـرا =وتـازي جريمـه بالقريـا وقــاري
واجهدت في طلـب العـلا ليـن قـرا =وطاب الكرى مع لاسعـات الخـزاري
ومن غاص غبات البحـر جـاب درا = واضوت مصابيح السرى كل سـاري
وانا احمد اللي جـاب لـي ماتحـرى =واذهب غبـار الـذل عنـي وطـاري
والعـمـر مـايـزداد مـثـقـال ذرا =عمر الفتى والرزق فـي كـف بـاري
وصـلاه ربـي عـد ماخـط بالـرا =على النبي ما طـاف بالبيـت عـاري

التوقيع

قال الشافعي رحمه الله: أركان الرجولة أربع: الديانة والأمانة والصيانة والرزانة. قال الخليل ابن أحمد: التواني إضاعة, والحزم بضاعة, والإنصاف راحة, واللجاجة وقاحة. اللهم أنصر من نصر الدين وأخذل من خذل الدين