السلام عليكم ورحمة الله وبركاته
هذه محاورة من المحاورات القديمة وعلى بداية المغترة انذاك والعهدة على الراوي طبعاً كانت بين الشاعرين فيصل الرياحي رحمه الله والشاعر مستور العصيمي اطال الله بقائه وحسب ذكر اصحاب الاختصاص بأن هذه ربما تكون اول محاورة بينهم
فيصل الرياحي
سارت بنا اقدامنا والقلب شيخ القدم = للقبة اللي هل التوحيد بانينها
مستور مخلوق من ضمن البشر من عدم = نبغاه يسمع هروج الصدق في حينها
مستور العصيمي
جابوك يافيصل اهل السيف واهل العلم = اللي مخاليبها تسبق جناحينها
اعلوم بيني وبينك مثل خط القلم = يازينها من هذاك الوقت يازينها
فيصل الرياحي
لولا هل السيف ماعبيت بطنك شحم = اتهجّد الناس وتفتش مواعينها
اعلومنا طيبه ياضب كب الحدم = قدام تنصب لك الدنيا موازينها
مستور العصيمي
احسن من اللي مفلي في قيوع السلم = صاحبت لي عالمٍ ديني على دينها
معمور بيت الشرف ياصاحبي ما انهدم = بعض السواليف وين انتم مسرينها
فيصل الرياحي
لاجا بيرميني اعور وان حذفني عسم = عليه الابواب محكمهٍ كوالينها
شلفا ذياب ابن غانم ظربها في لحم = والظاهر انك من اللي مستحقينها
مستور العصيمي
كم قلت لك ياطويل العمر ياكم وكم = بعض السوالف بعيد ولاوصل حينها
حرام دمك علينا مثل دم الحلم = والا من العصر حدينا سكاكينها
فيصل الرياحي
اشوف لي صيدةٍ بطلق عليه السهم = من طيب حظي تعرضني كراعينها
ماعاد يكبر سنامك يابعير التهم = قطعى تهامة وقطعى في بعارينها
مستور العصيمي
ضربت بالسيف لين السيف فيك انثلم = عيت طبوعك تغيّر ليه ؟ ياشينها
راح الرياحي علينا مثل حج العجم = هذا الليالي منى كثرت شياطينها
فيصل الرياحي
لن جاك عيّة تركد واستمع وافتهم = لاتنملص منك عشرتها وعشرينها
واحد سرى في ظلام الليل ثم انجّم = ماعاد يدري دروب المعرفة وينها
مستور العصيمي
آثرك عية صحيح تخم الاعلام خم = خابرك في قاسي الدنيا وفي لينها
فتّح عيونك ترى فالدرب قبلك لغم = ليلتك هاذي ترى ما الناس راضينها
فيصل الرياحي
عية ولا اريد من شرواك حبة خشم = لين ان لبنان ترجع مع فلسطينها
لاتعرض الساق قدام امهات الدرم = ترى البلاجيك جاهزةٍ نياشينها
مستور العصيمي
ياصاحبي لو نظمت الشعر معك انظم = باق السواليف تبقى في مواعينها
بغيتها فالحروب ووقعت في دهم = ماحال دون البلاد الا سلاطينها
| التوقيع |
انا مثل الحكومة وأمري منفذّ على الشعار
ولي سلطة على الشعار والشعار خدّامي
جارالله السواط
للتواصل :
nofi3e@hotmail.com |