نيااااف
سلام مبداه الوفا لأهل الوفا في كل حين=للشجرة اللي ثابتة ومثبتة بعروقها
المنتدى باسم القبيلة والرجال الطيبين=وان كان معجب ما درى النار من محروقها
معجب العتيبي
يامرحبا ترحيبةٍ فيها من اوصاف الثمين=فيها من اوصاف الذهب لو يختلف منطوقها
جمله صحيحه ما اختلف فيها الثلاثه والثنين=والواجب ان اصحابنا مايتركون حقوها
نيااااف
اليا نشدت اللي سكن فدبي من أم القوين=ينكر مبانيها وينكر باعها في سوقها
والمشكلة إن السبب ابليس وابليس اللعين=اليا دخل بين العرب تلازمت بحلوقها
معجب العتيبي
مايجحد اهل العرف غير اللي يشوف بنص عين=اما عور والا عما مانختلف بفروقها
اليا عرفت اسباب موت القلب ياعبدالمعين=جنب عن الاسباب يارجال قبل تذوقها
نيااااف
في شاعر المليون فجرنا قلوب المرجفين=والشمس يبدي نورها قدَام وقت شروقها
وانا أطلب الله كل ما وجهت يم القبلتين= ماتنشقر ذيك العصا مابين برقا وروقها
معجب العتيبي
في كل موقف فعلنا الطيب على العالم يبين=وام الجدايل لاتقدمنا تميّز شوقها
وانا اطلب الله يبقي اهل العز والجنب المتين=عتيبه الهيلا ويبعد من يدور عوقها
نيااااف
حظي وحظك فالبداية والنهاية مسلمين= مانعترف باللي يغش الناس والا يبوقها
أنته مراقب والحذر ثم الحذر لا تستهين=إن شفت شي من الْهمل عن منتدانا سوقها
معجب العتيبي
هاذيك نعمه من عزيز الشان حنا عارفين=والناس تشكر باللسان وتشكر بمغلوقها
دامك عرفت بواجبي لابد اشوفك لي تعين=والناس فوق الناس منصب والولي من فوقها
نيااااف
تامر علانا لوتبانا نذبح الكبش السمين=وندوس راس الحية اللي سمها بشدوقها
حذِر ونذِرقلُهم حنا ترانا جاهزين=ياكم من نفسٍ تفز والعين من مبلوقها
معجب العتيبي
انا اشهد ان الله عطاك الفكر والعقل الرزين=تسلم وروس اهل الردا تبلش بكثر فلوقها
ياصاحبي نياف خل اللي يناظرنا حزين=لاتلتفت يمه ولو يمك نظر قل سوقها